Gýanchjoý jármeńkesindegi sheteldik satyp alýshylar sany rekordtyq deńgeıge jetti
ASTANA. KAZINFORM – Jeksenbi kúni Qytaıdyń ońtústigindegi Gýandýn provıntsııasynyń Gýanchjoý qalasynda 139-shy Qytaı ımport jáne eksport jármeńkesiniń (Gýanchjoý nemese Kanton jármeńkesi) birinshi kezeńi aıaqtaldy, dep habarlaıdy Sınhýa agenttigi.
Alǵashqy kezeńge sheteldik satyp alýshylar rekordtyq deńgeıde qatysty. Bul týraly jármeńkeni uıymdastyrýshy Qytaıdyń syrtqy saýda ortalyǵy habarlady.
Resmı málimetterge sáıkes, jeksenbi kúni saǵat 17:00-degi jaǵdaı boıynsha oflaın formattaǵy jármeńkege 216 el men óńirden shamamen 167 myń satyp alýshy qatysqan. Bul kórsetkish aldyńǵy jármeńkeniń osy kezeńimen salystyrǵanda 5,9 paıyzǵa joǵary.
Uıymdastyrýshylardyń aıtýynsha, mundaı joǵary qatysý kórsetkishi – jármeńkeniń alǵashqy kezeńi tarıhyndaǵy eń joǵarǵy nátıje. Bul Qytaıdyń syrtqy saýdasynyń turaqtylyǵy men ómirsheńdigin aıǵaqtaıdy. «Aldyńǵy qatarly óńdeýshi ónerkásip» taqyrybyna arnalǵan birinshi kezeńde 25 myńnan astam stend qoıylyp, 12 myńnan asa eksponent óz ónimderin usyndy.
Bıyl jármeńke úsh kezeńge bólinip ótkiziledi jáne 5 mamyrǵa deıin jalǵasady. 23–27 sáýirge josparlanǵan ekinshi kezeń «Sapaly turmystyq ómir» taqyrybyna arnalmaq. Onda qurylys materıaldary, jıhaz, turmystyq zattar, syılyqtar men dekor ónimderi usynylady.
Gýanchjoý jármeńkesi 1957 jyly qurylǵan jáne jylyna eki ret Gýanchjoý qalasynda ótedi. Bul Qytaıdaǵy eń uzaq ýaqyt boıy ótkizilip kele jatqan keshendi halyqaralyq saýda kórmesi sanalady jáne eldiń syrtqy saýdasynyń jaǵdaıyn kórsetetin mańyzdy ındıkatorlardyń biri.
Aıta keteıik, osy aptada Astanada Astana Eurasian Book Fair–2026 halyqaralyq kitap kórme-jármeńkesi ótedi.
