Gýanchjoý telearnasy Qazaqstan týraly trevel-joba daıyndap jatyr

ASTANA. KAZINFORM – Gýanchjoý radıo jáne teledıdary Qazaqstan aýmaǵynda «Make Friends in the Silk Road» halyqaralyq jobasynyń túsirilimin qolǵa aldy. Baǵdarlama Qazaqstan men Qytaı arasyndaǵy týrıstik jáne mádenı baılanystardy damytýǵa arnalǵan jáne derekti trevel-shoý formatynda usynylady.

Joba tsıfrlyq platformalarda keń halyqaralyq tanymaldyqqa ıe bolǵan jáne mıllıondaǵan aýdıtorııa jınaǵan «Gonkong jastary shekara mańyndaǵy qalalarda» derekti týyndynyń jalǵasyna aınalady.

Jobaǵa qatysýshylar - eki elden kelgen jas blogerler. Olar jeke tájirıbesi arqyly kórermenderdi Qazaqstan men Qytaıdyń týrıstik áleýetimen, mádenıetimen, dástúrlerimen jáne qazirgi jastarynyń qundylyqtarymen tanystyrady.

«Bıyl biz Qytaıdyń eń iri megapolısteriniń biri – Gýanchjoýmen týrıstik yntymaqtastyqty nyǵaıttyq. Eki eldiń týroperatorlary arasynda b2b-kezdesýler ótti, QHR týrıstik ındýstrııasy ókilderi úshin aqparattyq týrlar uıymdastyryldy, Air Astana áýe kompanııasy Gýanchjoý-Almaty tikeleı áýe reısin ashty. Bizdiń QHR naryǵyndaǵy júıeli jumysymyz turaqty ósimdi kórsetýde. Bıylǵy 11 aıda Qazaqstanǵa aspan asty elinen kelýshiler qatary 876 myńnan asty. Ótken bir jylda bul kórsetkish 655 myń adamdy quraǵan edi. Mundaı jobalar Qazaqstannyń Azııadaǵy negizgi týrıstik naryqtardyń birinde qatysý deńgeıin keńeıtýge múmkindik beredi», – dep atap ótti «Kazakh Tourism» UK» AQ Basqarma tóraǵasynyń mindetin atqarýshy Danıel Serjanuly.

Qazaqstandaǵy túsirilimder Almaty men Astananyń negizgi týrıstik jáne mádenı lokatsııalaryn qamtıdy. Ońtústik astanada shyǵarmashylyq top qalalyq ortamen, gastronomııalyq mádenıetpen tanysyp, Shymbulaq taý-shańǵy kýrortyna bardy. Astanada joba sheteldik aýdıtorııaǵa elordanyń zamanaýı sáýlettik kelbetin, qalanyń serpindi damýy men ınfraqurylymyn tanystyrady.

Telejoba Gýanchjoý teledıdarynda jáne GBA Life Style medıaholdınginiń halyqaralyq paraqshalarynda kórsetiledi.

Aıta keteıik, Baıanaýylda qysqy týrızm ashyldy.