Gýanchjoý qalasyndaǵy XVI jazǵy Azııa oıyndaryna Qazaqstannan sporttyń 36 túri boıynsha 341 sportshy qatysady

Bul týraly búgin ótken baspasóz máslıhatynda QR Týrızm jáne sport mınıstrligi Sport komıtetiniń tóraǵasy Elsııar Qanaǵatov aıtty.

«Bizdiń komandanyń quramynda árıne, Olımpıada chempıony Ilıa Ilın bolady. Onymen birge, grek-rım kúresi boıynsha Olımpıada oıyndarynyń qola medal ıegeri Áset Mámbetov, Nurbaqyt Teńizbaev, bokstan álemniń eki dúrkin chempıony Serik Sápıev, aýyr atletshiler Marııa Grabovetskaıa, Svetlana Podobedova, Maııa Maneza, shahmatshy Dármen Sádýaqasov, atqyshtar komandasynyń ókili Olga Dovgýn jáne kóptegen taǵy basqa sportshylar bar», - dedi ol.

Komıtet tóraǵasy atap kórsetkendeı, Qytaıdaǵy baıraqty básekede barlyǵy Olımpıada oıyndarynyń 1 chempıony men 7 júldegeri, Álem chempıonattarynyń 7 chempıony men 11 júldegeri, Azııa chempıonattarynyń 47 chempıony men 76 júldegeri óner kórsetedi.

Bizdiń sporttyq delegatsııa quramynyń negizin Almaty qalasynyń (41,6 paıyz), Ońtústik Qazaqstan (12,7), Qaraǵandy (7,2) oblystarynyń jáne Astana qalasynyń (6,3) sportshylary quraıdy.

Eske salaıyq, Gýandjoýda ótkeli otyrǵan qurlyqtyq oıyndar tórt jylda bir uıymdastyrylady jáne ol «Azııa Olımpıada oıyndary» degen beıresmı ataýǵa ıe. Oıyndar óz sanaýyn 1951 jyly Delı (Úndistan) qalasynda bastaǵan bolatyn.

Búgingi kúni atalmysh jarystarǵa daıyndyq jumystary aıaqtalýǵa jaqyn. Uıymdastyrýshylardyń málimetterine súıensek, oıyndarǵa Azııanyń 45 elinen barlyǵy 12 myńǵa jýyq sportshy qatysady. Oıyndar sporttyń 57 túri boıynsha ótkiziledi.