Gýanchjoý qalasynda Azıada oıyndaryn ótkizýge quıylǵan ınvestıtsııa 18 mlrd. AQSh dollaryna jýyq qarajatty qurady
BEIJІŃ- GÝANChJOÝ. Qazannyń 18-i. QazAqparat /Rýslan Súleımenov/ - XVI Azıada oıyndaryna Gýanchjoý qalasynyń (Qytaıdyń ońtústik provıntsııasy - Gýandýn) merııasy qalalyq ınfraqurylymdy qaıta jańartý úshin, sport nysandarynyń qurylysy men qaıta qurastyrylýy úshin iri ınvestıtsııa quıdy. Oıyndardyń ótkizilýine tartylǵan ınvestıtsııanyń jalpy mólsheri 18 mlrd. AQSh dollaryna jýyq qarajatty qurady.
Gýanchjoý qalasynyń meri Van Tsınlıannyń sózine qaraǵanda, ınvestıtsııa bıýdjet aıasynda tartylǵan. Alaıda joǵary laýazymdy sheneýnik Gýanchjoý qalasyndaǵy Azııa oıyndary tarıhtaǵy eń aýqymdy, sonymen qatar, ekonomıkalyq turǵysynan da úlken oıyndarǵa aınalady dep atap ótti.
Uıymdastyrý komıtetiniń habarlaýynsha, Azııa oıyndarynyń barysynda jarystar ótetin 53 alań men 17 jattyǵý alańdaryn qosa alǵanda, 70 stadıon men mekeme jumys isteıtin bolady. Osy 70 sport nysanynyń arasynda 12 nysan qaıta salynǵan jáne 58 nysan keńeıtilgen. «Barlyq stadıondardyń qurylysy men qaıta qurastyrylýy aıaqtaldy, endi qarashanyń 1-inen bastap sportshylar olarǵa kelip jattyǵa alady», - dep atap ótti qala meri.
Esterińizge sala keteıik, aǵymdaǵy jylǵy qarashanyń 12-27-si aralyǵynda Gýanchjoý qalasynda 16-shy Azııa oıyndary ótedi. Báıge barysynda Azııanyń 45 aımaǵy men elderinen kelgen 12 myńǵa tarta sportshy 42 sport túri boıynsha baq synasady.
