Gýanchjoý – Almaty áýe reısinde jolaýshy qaıtys boldy

ALMATY. KAZINFORM – Áleýmettik jelide Gýanchjoý – Almaty reısinde bir jolaýshynyń qaıtys bolǵany týraly habar tarady. 

Kóliktegi polıtsııa departamenti Kazinform tilshisine bul aqparatty rastady. 

Almaty áýejaıyndaǵy jelilik polıtsııa bólimi atalǵan fakti boıynsha qylmystyq is qozǵady.

– Aldyn ala ólim sebebi – sozylmaly aýrý. Oqıǵanyń mán-jaıy anyqtalyp jatyr. Onyń nátıjesi boıynsha protsessýaldyq sheshim qabyldanady. QR QPK-niń 201-babyna sáıkes ózge aqparat jarııa etilmeıdi, - delingen habarlamada.

Eske salaıyq, buǵan deıin Aqtóbe – Almaty baǵytyndaǵy áýe reısinde jolaýshy kóz jumǵanyn jazǵan edik. 

SCAT áýe kompanııasynyń DV 712 reısi 9 jeltoqsan kúni keshkisin Aqtóbe – Almaty baǵytynda jolǵa shyqqan. Alaıda kóp uzamaı jolaýshylardyń biri ózin jaısyz sezingen. Sol kezde áýe komandıri Aqtóbe áýejaıyna qaıta oralýǵa sheshim qabyldap, ushaq saǵat 22:50-de Aqtóbe áýejaıyna qaıta qondy. Ushaq áýejaıǵa qonǵan soń shuǵyl medıtsınalyq kómek kórsetildi. Alaıda jolaýshyny aman alyp qalý múmkin bolmady.