GTA 6 oıyny AQSh ekonomıkasyna 1 mlrd dollar shyǵyn keltirýi múmkin
ASTANA. KAZINFORM — Qarasha aıynda kópten kútken Grand Theft Auto VI oıynynyń jaryqqa shyǵýy AQSh ekonomıkasyna aıtarlyqtaı áser etýi múmkin. Óıtkeni kóptegen amerıkalyq ony oınaý úshin jumystan demalys alady, dep habarlaıdy Kazinform agenttiginiń Vashıngtondaǵy menshikti tilshisi The Hill basylymyna silteme jasap.
International Business Times basylymy Barselonadaǵy Pompeý Fabra ýnıversıtetiniń ekonomıka professory Hose Garsııa Montalvonyń esebine súıene otyryp, GTA VI oıynynyń shyǵýyna baılanysty jumystan jappaı qalý AQSh ekonomıkasyna 1 mıllıard dollarǵa jýyq shyǵyn keltirýi múmkin ekenin jazdy.
Montalvonyń esebinshe, AQSh-taǵy 18-30 jas aralyǵyndaǵy shamamen 1,5 mıllıon qyzmetker bir kún jumysqa shyqpaıdy. Olardyń ortasha jyldyq tabysy 70 myń dollarǵa jýyq, al bul eńbek ónimdiliginiń qysqa merzimde shamamen 2 paıyz tómendeýine ákeledi.
Bul jaǵdaı buryn da bolǵan. 2013 jyly GTA 5 oıyny jaryqqa shyqqan kúni Los-Andjeles pen Nıý-Iork sııaqty qalalarda 18-35 jas aralyǵyndaǵy qyzmetkerlerdiń 6 paıyzyna jýyǵy jumystan demalys alǵany týraly derekter bar.
Rockstar Games kompanııasy 2022 jylǵy aqpanda Grand Theft Auto VI oıynyn ázirlep jatqanyn jarııalaǵannan beri, áıgili krımınaldyq ekshn serııasynyń jankúıerleri jańa bólimniń shyǵýyn asyǵa kútti.
Oıynǵa aldyn ala 79,99 dollarǵa tapsyrys berýge bolady.
Buǵan deıin qumar oıyndarǵa táýeldilik qalaı emdeletinin jazǵan edik.
