GSM Qazaqstan/Kcell jeli ishinde qońyraý shalý tarıfterin tómendetti
ASTANA. 16 mamyr. QazAqparat - 15 mamyrdan bastap GSM Qazaqstan/Kcell Activ, Kcell, Vegaline jelileri ishinde qońyraý shalý tarıfterin 20 paıyzǵa tómendetti,
dep habarlady kompanııanyń baspasóz qyzmetinen.
Endi GSM Qazaqstan/Kcell jelileri ishindegi sóılesý mınýtynyń joǵary quny QQS qosa eseptegende 20 teńgeni quraıdy. Kompanııanyń atalmysh áreketi birneshe jyldardan beri GSM Qazaqstan/Kcell júrgizip kele jatqan tarıfterdi kezeń - kezeńmen tómendetý strategııasy aıasynda jalǵasýda. «Bizdiń kompanııanyń maqsaty - abonentterge orasan paıda ákele otyryp, Qazaqstannyń barlyq turǵyndarynyń uıaly baılanysqa qoljetimdiligin qamtamasyz etý. Bizdiń bul qadamymyz qazaqstandyqtardyń uıaly baılanysqa jumsaıtyn shyǵynyn aıtarlyqtaı azaıtady jáne aldaǵy ýaqytta elimizdiń telekommýnıkatsııa naryǵynda básekelestiktiń damýyna jol ashady dep senemiz», - dedi GSM Qazaqstan/Kcell kompanııasynyń bas atqarýshy dırektory Veısel Aral.
Buǵan deıin de kompanııa óz abonentteriniń uıaly baılanys shyǵyndaryn azaıtý baǵytynda jasalǵan qadamdaryn habarlaǵan bolatyn. Atap aıtqanda, kompanııa aqpanda barlyq tarıftik josparlarǵa qosylý aqysyn alyp tastady, naýryzda sekýndtyq tarıfteý engizdi, uıaly ınternet baǵasyn 35 esege tómendetti. Osyǵan qaramastan kompanııa Qazaqstan Respýblıkasynyń árbir turǵyny úshin uıaly baılanysqa qoljetimdilikti munan da arttyrý úshin jańa baǵalyq usynystar ázirleýdi jalǵastyrýǵa daıyn.
