GSM Qazaqstan/Kcell kompanııasy úshinshi býyn jelilerin qurý úshin ondaǵan mıllıon AQSh dollaryn jumsaýǵa daıyn - Veısel Aral
ALMATY. Maýsymnyń 21-i. QazAqparat /Erbol Turymbetov/ - GSM Qazaqstan/Kcell kompanııasy 3G tehnologııasyn endirýdi QR Salyq kodeksine ózgerister engizýmen qatar júrgizý qajet dep sanaıdy. Ony kompanııanyń Bas atqarýshy dırektory Veısel Aral búgin Almatyda ótken baspasóz májilisinde málimdedi,
dep habarlaıdy QazAqparat.
Aǵymdaǵy aıdyń basynda QR Úkimetiniń ókilderi 3G lıtsenzııasynyń jyl saıynǵy aqysyn qaıta qarastyrý úshin QR Salyq kodeksine ózgeris engizý qajettigin aıtqan bolatyn. GSM Qazaqstan/Kcell kompanııasynyń pikirinshe, aǵymdaǵy salyq zańnamasy 3G lıtsenzııasyna alǵashqy jyl saıynǵy tólemdi ornatýǵa múmkindik beredi.
«Búgingi tańda kompanııamyz úshinshi býyn jelilerin qurý úshin ondaǵan mıllıon AQSh dollaryn jumsaýǵa daıyn. Sondyqtan jyl saıynǵy tólem mólsheriniń máselesi el ekonomıkasyna engizilgen ınvestıtsııalarǵa kedergi bolmaýy tıis. GSM Qazaqstan/Kcell kompanııasy Salyq kodeksine ózgeristerdi 3G engizýmen jáne paıdalanýdy bastaýmen qatar júrgizýdi usynady. Sonymen qatar, kompanııa jyl saıynǵy tólem mólsheriniń qajetti deńgeıge deıin ósýine qarsy emes», dedi Veısel Aral.
2010 jyldyń 4-shi maýsymynda ótken Sheteldik ınvestorlar keńesiniń májilisinde TeliaSonera kompanııasy prezıdenti Lars Nıberg 3G tehnologııasyn damytýdyń keshendi máseleleri jóninde sóz qozǵaǵan edi. Onda Elbasy elimizdegi telekommýnıkatsııa naryǵyn damytýǵa múddeli ekendigin aıtty. Sonymen qatar, úkimettiń GSM operatorlaryna Qazaqstanda 3G jelilerin jyldam endirýine qoldaý kórsetý qajettigin málimdegen bolatyn.
