Grýzııanyń Qazaqstanǵa qaryzy qashan qaıtarylady

ASTANA. QazAqparat - Parlament Májilisiniń jalpy otyrysynda palata depýtattary «Qazaqstan Respýblıkasynyń aldyndaǵy Grýzııa Úkimetiniń bereshegin qaıtadan qaıta qurylymdaý týraly kelisimdi ratıfıkatsııalaý týraly» zań jobasyn maquldady, dep habarlaıdy QazAqparat.

«Grýzııa Úkimetiniń Qazaqstan Úkimetiniń aldyndaǵy boryshy 27 mln 774 myń AQSh dollaryn quraıdy. Ol 1992-1993 jyldary eki eldiń ulttyq bankteri arasynda ózara esep aıyrysý nátıjesinde paıda boldy jáne memlekettik nesıe retinde qaıta rásimdeldi. Qaıtadan qaıta qurylymdaý týraly kelisimge sáıkes, Grýzın tarapy Qazaqstan aldyndaǵy bereshegin tıisti sharttar boıynsha óteıdi», - dedi QR Qarjy mınıstri Baqyt Sultanov.

Mınıstrdiń sózine qaraǵanda,  paıyzdyq mólsherleme jyldyq 4 paıyzdyq deńgeıde saqtalady. Sonymen qatar bereshekti óteý kestesi merzimin ótkizgeni úshin jınalǵan ósimpuldy esepke almaıdy jáne Parıj klýby usynystaryna sáıkes uzartylady.

«Osylaısha, 2017 jylǵy Kelisimge sáıkes 2017-2025 jyldardaǵy kezeńge Grýzııa tarapynyń tólemder somasy 37 mln 997 myń 815 AQSh dollaryn quraıdy», - dedi Qarjy mınıstri.

Talqylaýlardan keıin palata depýtattary zań jobasyn maquldady.