Grýzııanyń jańa patrıarhy saılandy
ASTANA. KAZINFORM — Grýzııanyń jańa patrıarhy bolyp mıtropolıt Shıo saılandy, dep habarlady BBC.
Saılaý Tbılısıdiń eski bóligindegi Qasıetti Úshtik soborynda (Sameba) — Grýzın pravoslav shirkeýiniń basty kafedraldy hramynda ótti.
Tańerteń munda túrli eparhııalardan myńnan astam delegat — din qyzmetkerleri men qarapaıym qaýym ókilderi jınaldy. Alaıda shirkeýdiń jańa basshysyn saılaý quqyǵyna tek Qasıetti sınodtyń 39 múshesi ıe boldy.
Birinshi týrda jeńiske jetý úshin kandıdat epıskoptardyń kópshilik daýysyn, ıaǵnı keminde 20 daýysty jınaýy qajet edi.
Patrıarh taǵyna ýaqytsha jetekshilik etken, Grýzın pravoslav shirkeýin jańa patrıarh saılanǵanǵa deıin basqarǵan mıtropolıt Shıonyń kandıdatýrasyn 22 arhıereı qoldady.
Qalǵan eki úmitker — mıtropolıt Iov (Akıashvılı) pen mıtropolıt Grıgol (Berbıchashvılı) tıisinshe toǵyz jáne jeti daýys aldy.
Grýzın pravoslav shirkeýiniń jańa basshysy Katolıkos-Patrıarh Іlııa II qaıtys bolǵannan keıingi 55-kúni saılandy. Ol qazirgi Grýzııa tarıhyndaǵy eń qurmetti tulǵalardyń biri sanalǵan.
Keńes dáýirinde patrıarh atanǵan Іlııa II uzaq jyldar boıy qoǵam senim artqan rýhanı kóshbasshy boldy. Saıasatkerler de onyń pikirine qulaq asyp otyrǵan.
Eske salaıyq, Grýzın pravoslav shirkeýiniń basshysy Patrıarh Іlııa II densaýlyǵynyń nasharlaýyna baılanysty Tbılısıdegi Kavkaz medıtsınalyq ortalyǵyna jatqyzylyp, 94 jasynda qaıtys bolǵan edi.
Aıta keteıik, Grýzııa temirjol salasyn jańǵyrtýǵa 370 mln dollardan astam ınvestıtsııa saldy.
