Grýzııanyń úsh túrmesinde tutqyndar sany shamadan tys artqan
ASTANA. KAZINFORM — Grýzııadaǵy úsh túzeý mekemesinde sottalǵandar sany belgilengen oryn sanynan 1 589 adamǵa artyq, dep habarlaıdy Kazinform agenttiginiń óńirdegi menshikti tilshisi News On.ge basylymyna silteme jasap.
Al Tbılısıdegi Gldanı túrmesinde adam sany belgilengen mejeden 742 adamǵa asyp ketken.
Grýzııa Ulttyq statıstıka qyzmetiniń (Sakstat) málimetinshe, qyrkúıek aıynda Tbılısıdegi № 8 túrmede 2 426 adamǵa arnalǵan orynǵa 3 168 tutqyn ornalastyrylǵan. Ksanı aýylyndaǵy № 15 mekemede 1 604 orynǵa 2 159 adam qamalǵan. Sondaı-aq Kýtaısıdegi № 2 túrmede belgilengen 1 068 orynnan 292 adam artyq otyrǵan.
Degenmen eldegi túrmelerdiń jalpy syıymdylyǵy ázirge shekten asqan joq. Qyrkúıekte 14 túzeý mekemesinde 12 548 orynǵa shaqqanda 12 375 adam jazasyn ótegen. Al tutqyndar sany jyl basynan beri 1 145 adamǵa, tamyz aıymen salystyrǵanda 63 adamǵa artqan.
Bılik jekelegen túrmelerdegi adam sanynyń shamadan tys kóbeıýin tutqyndardy ustaý rejımine, tergeý mártebesine jáne sottardyń ornalasýyna qaraı bólýmen baılanystyrady. Budan bólek sottalǵandardyń artýyna esirtki qylmystaryna qarsy kúrestiń kúsheıýi sebep bolǵan.
Buǵan deıin elimizde túrmeden shyqqandardyń qaıta qylmys jasamaýy úshin qandaı sharalar qabyldanyp jatqanyn jazǵan edik.
