Grýzııanyń týrızmnen túsken tabysy alty aıda 1,93 mlrd dollarǵa jetti
ASTANA. KAZINFORM — 2026 jyldyń qańtar-maýsym aılarynda Grýzııanyń halyqaralyq týrızmnen túsken tabysy 1 mlrd 931 mln AQSh dollaryn qurady, dep habarlaıdy Kazinform agenttiginiń óńirdegi menshikti tilshisi Business Media basylymyna silteme jasap habarlaıdy.
Bul ótken jyldyń sáıkes kezeńimen salystyrǵanda 2%-ǵa az.
Grýzııa Ulttyq bankiniń málimetinshe, kórsetkishtiń tómendeýine negizinen ekinshi toqsandaǵy nátıjeler áser etken. Sáýir-maýsym aılarynda halyqaralyq týrızmnen túsken tabys 1 mlrd 101 mln dollardy qurap, 2025 jyldyń osy kezeńimen salystyrǵanda 3,8%-ǵa qysqarǵan.
Birinshi jartyjyldyqta Grýzııaǵa eń kóp týrıstik tabys ákelgen el — Reseı boldy. Reseıden kelgen týrıster el ekonomıkasyna 307,1 mln dollar kiris túsirgen. Odan keıin Túrkııa — 255 mln dollar jáne Izraıl — 222,7 mln dollar kórsetkishimen tur.
Týrızmnen túsken tabys kólemi boıynsha Ázerbaıjan tórtinshi orynǵa jaıǵasty. Qańtar-maýsym aralyǵynda bul eldiń týrısteri Grýzııa ekonomıkasyna 107,6 mln dollar ákelgen. Bul ótken jylmen salystyrǵanda 5%-ǵa kóp.
Alǵashqy bestikke Ýkraına da endi. Ýkraınadan kelgen týrısterdiń shyǵyny 99 mln dollardy qurap, ótken jyldyń birinshi jartyjyldyǵymen salystyrǵanda 42%-ǵa artqan.
Sonymen qatar Eýropalyq odaq elderinen kelgen týrısterdiń arqasynda túsken tabys aıtarlyqtaı ósti. 2026 jyldyń alǵashqy alty aıynda bul kórsetkish 335,6 mln dollarǵa jetip, bir jylda 58,6 mln dollarǵa nemese 21%-ǵa artty.
Sonymen birge Grýzııaǵa jasalǵan halyqaralyq saparlar sany azaıǵan. Birinshi jartyjyldyqta elge 2 mln 734 myń 504 halyqaralyq kelý tirkeldi. Bul ótken jyldyń sáıkes kezeńimen salystyrǵanda 2,7%-ǵa tómen. Eń úlken tómendeý Irannan kelgen kelýshiler arasynda baıqalyp, olardyń sany shamamen 49%-ǵa qysqardy.
Buǵan deıin 14 shildeden bastap qazaqstandyq Fly Arystan áýe kompanııasy Atyraý men Batýmı arasynda jańa turaqty áýe reısin iske qosatyny habarlandy.
