Grýzııanyń týrızmnen túsken tabysy 6,6 paıyzǵa ósip, 1,66 mlrd dollarǵa jetti

ASTANA. KAZINFORM — Grýzııanyń halyqaralyq týrızmnen túsken tabysy 2025 jyldyń úshinshi toqsanynda 1,66 mıllıard dollardy qurady. Bul ótken jyldyń sáıkes kezeńimen salystyrǵanda 6,6 paıyzǵa kóp, dep habarlaıdy Grýzııa Ulttyq banki.

Tabystyń úlken bóligi Eýropalyq Odaq elderinen kelgen týrısterge tıesili boldy, olar 238 mıllıon dollar alyp keldi, bul ótken jylmen salystyrǵanda 13% ósken kórsetkish. Ásirese Ázerbaıjan men Izraılden kelgen týrısterden túsken tabys tez ósýde — ósim tıisinshe 36% jáne 28% qurady. Sonymen birge Reseıden kelgen týrısterden túsken tabys azaıyp keledi — úsh aı ishinde 14% tómendedi.

Kirister boıynsha Reseı 252,5 mıllıon dollarmen kósh bastap tur, odan keıin EO elderi 238,2 mıllıon dollarmen, Túrkııa 195,7 mıllıon dollarmen tur. Sondaı-aq Izraıl (188,3 mıllıon dollar), Saýd Arabııasy (85,9 mıllıon dollar), Ázerbaıjan (66,4 mıllıon dollar), Armenııa (61,4 mıllıon dollar), Ýkraına (44,9 mıllıon dollar), Iran (42,9 mıllıon dollar) jáne Belarýs (36,9 mıllıon dollar) aıtarlyqtaı úles qosty.

2025 jyldyń qańtar-qyrkúıegi aralyǵynda Grýzııanyń halyqaralyq týrızmnen túsken tabysy 3,6 mıllıard dollarǵa jetti, bul ótken jyldyń sáıkes kezeńimen salystyrǵanda 5,1%-ǵa ósti.

Alaıda, sarapshylar Grýzııada júrgen Reseı, Belarýs jáne Ýkraına azamattarynyń birazy munda turaqty turatynyn jáne turǵyndar bolyp esepteletinin aıtady. Sondyqtan olardyń shyǵystary týrıstik kiris retinde eseptelmeıdi. Osyǵan qaramastan, Grýzııa týrızmdi belsendi damytyp, dúnıejúzinen kelýshiler sanyn arttyryp keledi.

Buǵan deıin Grýzııada jolaýshylar aǵynynyń rekordtyq ósimi tirkelgeni habarlanǵan bolatyn. Ekinshi toqsanda elge 1,8 mıllıon shetel azamaty kelip, ótken jyldyń sáıkes kezeńimen salystyrǵanda 6,9 paıyzǵa artqan.