Grýzııanyń OSK saılaýdy burmalaý týraly aıyptaýlardy tergeýge shaqyrdy

ASTANA. KAZINFORM – Grýzııanyń Ortalyq saılaý komıssııasy prokýratýraǵa prezıdent Salome Zýrabıshvılı tarapynan taǵylǵan aıyptardyń negizdiligin anyqtaý ótinishin berdi, dep habarlaıdy Kazinform menshikti tilshisi.

«Grýzııa Prezıdentiniń, saıasatkerlerdiń nemese kez kelgen múddeli tulǵanyń málimdemesi, sondaı-aq saılaýdy burmalaý týraly taratylǵan aqparat shyndyqqa sáıkes keletinin anyqtaý úshin saılaý ákimshiliginiń quzyretinen tys kúrdeli jáne obektıvti tergeý júrgizý qajet», - delingen habarlamada.

OSK aqparatynsha, parlamenttik saılaý qorytyndylary jarııalanǵannan keıin Ortalyq saılaý komıssııasy shabýyldar men negizsiz syn nysanasyna aınalǵan.

«Grýzııa prezıdenti Salome Zýrabıshvılı, sondaı-aq saılaýǵa qatysatyn keıbir saıası partııalardyń ókilderi OSK-ǵa negizsiz shabýyl jasap, dáıeksiz aıyptaýlar arqyly vedomstvo bedeline nuqsan keltirýge tyrysyp otyr», - dep málimdedi OSK.

OSK saılaý protsesine engizilgen Smartmatic kompanııasynyń tehnologııasy saılaýshylar tizimindegi saılaýshylar esimderiniń qaıtalanýyn boldyrmaıtynyn eske saldy jáne buǵan protsesti baqylaǵan barlyq halyqaralyq jáne jergilikti monıtorıng uıymdary kóz jetkizdi. 

«EQYU Demokratııalyq ınstıtýttar jáne adam quqyqtary jónindegi bıýro jáne basqa da halyqaralyq uıymdardyń baıqaý mıssııalary ózderiniń málimdemeleri men baǵalaýynda saılaýdyń bilikti jáne kásibı deńgeıde ótkenin rastady. Alaıda prezıdent jaǵdaıdy basqasha kórsetýge tyrysyp otyr», - dep atap ótti vedomstvoda. 

OSK tergeýmen yntymaqtasýǵa jáne tergeý úshin qajetti aqparat berýge daıyn ekenin málimdedi.

Eske sala ketsek, bıliktegi «Grýzın armany – demokratııalyq Grýzııa» partııasy parlamenttik saılaýda 56,1% daýys jınady.