Grýzııanyń OSK prezıdent saılaýyn ótti dep jarııalady

ASTANA.  KAZINFORM – Grýzııadaǵy prezıdent saılaýy Saılaý alqasynyń 300 múshesiniń jartysynan astamy qatysýy sebebimen ótti. Bul týraly brıfıngte Grýzııa OSK baspasóz hatshysy Natııa Ioselıanı málim etti, dep habarlaıdy Kazinform-nyń menshikti tilshisi.

— Saǵat 11:30-ǵa deıin saılaýshylar alqasynyń 170 múshesi protseske qatysyp úlgerdi. Sondyqtan saılaý ótti, - dedi ol.

OSK basshysy atap ótkendeı, daýys berý saǵat 14:00-ge deıin jalǵasady, sodan keıin OSK daýystardy sanaýdy bastaıdy. 

Búgin Grýzııada altynshy prezıdent saılanyp jatyr. Bul alǵash ret tikeleı halyqtyń daýys berýimen emes, saılaýshylar alqasy arqyly júzege asady.

Daýys berý parlament ǵımaratynda saǵat 14:00-ge deıin jalǵasady. Jańa memleket basshysyn 300 adamnan turatyn saılaýshylar alqasy saılaıdy.

Grýzııada prezıdent 5 jyldyq merzimge saılanady. Bul laýazymǵa jalǵyz úmitker – bıliktegi «Grýzın armany – Demokratııalyq Grýzııa» partııasynyń ókili, burynǵy fýtbolshy, parlament depýtaty Mıhaıl Kavelashvılı.

Grýzııanyń qazirgi prezıdenti Salome Zýrabıshvılı bul qyzmetti 2018 jyldyń 16 jeltoqsanynan beri atqaryp keledi. 

Buǵan deıin ol parlament «zańsyz» bolǵandyqtan, mandatynyń aıaqtalýyna qaramastan otstavkaǵa ketpeıtinin málimdegen.