Grýzııanyń burynǵy premer-mınıstri zańsyz paıda tapqanyn moıyndady
ASTANA. KAZINFORM – Grýzııanyń burynǵy premer-mınıstri Iraklıı Garıbashvılıdi eldiń Memlekettik qaýipsizdik qyzmeti tergep (MQQ), birneshe jyl boıy zańsyz tabys tapqanyn moıyndady, dep habarlaıdy Civil.ge.
Bul týraly brıfıng kezinde Sybaılas jemqorlyqqa qarsy qyzmet basshysy Emzar Gagnıdze málimdep, burynǵy premer-mınıstr tergeýmen tolyqtaı yntymaqtasyp otyrǵanyn atap ótti.
- Tergeý aldaǵy kúnderi Garıbashvılıdiń áreketiniń zańdyq saralanýy men oǵan qatysty bultartpaý sharasyn qoldaný máselesin qolda bar jáne jańadan alynǵan dálelder negizinde anyqtaıdy, - dedi Gagnıdze.
MQQ-niń málimdemesi Bas prokýratýrada ótken brıfıngten keıin jasalǵan. Al brıfıng barysynda Memleketti qaýipsizdik qyzmetiniń burynǵy basshysy Grıgol Lılýlashvılıdiń jaqyndarynyń biri Koba Hýndadzeniń ustalǵan habarlanǵan.
Prokýratýranyń málimetinshe, Hýndadzeniń úıin tintý kezinde 94 konvertte saqtalǵan 1,319 mln dollar tárkilengen. Oǵan toǵyz jyldan on eki jylǵa deıin bas bostandyǵynan aıyrý jazasy qarastyrylǵan asa iri kólemdegi aqshany jylystatty degen aıyp taǵyldy.
Budan basqa, prokýratýra ókili Djardjı Tsıklaýrı burynǵy bas prokýror Otar Partshaladzemen baılanysy bar tulǵa Mıhaıl Chohelıden 2,9 mln dollar tárkilengenin habarlady.
Bul áreketter 17 qazanda Garıbashvılı, Lılýashvılı, Partshaladze jáne olardyń eń jaqyn segiz seriginiń úılerine tintý júrgizilgen kezde bastalǵan tergeý amaldarynyń jalǵasy boldy.
Tintý kezinde qomaqty aqsha men baǵaly zattar tárkilendi. Onyń ishinde 198 qymbat altyn buıym men saǵat, qundy sýretter, myńdaǵan bettik qujattama, 50 uıaly telefon, 119 elektrondy qurylǵy bolǵan.
Tergeý bıliktegi «Grýzın armany» partııasynyń burynǵy ókilderimen jáne onymen baılanysty bıznes ókilderiniń otstavkaǵa ketýi, qylmystyq isteri jáne tutqyndalýy aıasynda júrgizilip otyr. Grýzııa bıligi tergeý sybaılas jemqorlyqqa qarsy júıeni nyǵaıtý jáne memlekettik qyzmettegi ashyqtyqty qamtamasyz etý úshin júrgizilip jatqanyn málimdedi.
Iraklıı Garıbashvılı premer-mınıstr qyzmetin 2013-2015 jyldary jáne 2021-2024 jyldary atqardy. Ekinshi merzimin aıaqtaǵan soń bul qyzmetti Iraklıı Kobahıdzege tapsyryp, 2025 jyldyń 25 sáýirinde saıasattan jáne partııadan ketetinin resmı túrde jarııalady.
Eske sala ketsek, qyrkúıekte Tbılısı soty sybaılas jemqorlyq qylmystary úshin ustalǵan Grýzııanyń burynǵy qorǵanys mınıstri Djýansher Býrchýladzege bultartpaý sharasy retinde qamaýda ustaýdy tańdady.
Buǵan deıin naýryz aıynda Grýzııanyń eks-prezıdenti Mıhaıl Saakashvılı 9 jylǵa sottaldy.