Grýzııanyń burynǵy premer-mınıstri bes jylǵa bas bostandyǵynan aıyryldy
ASTANA. KAZINFORM — Grýzııanyń burynǵy premer-mınıstri Iraklıı Garıbashvılı zańsyz kiristerdi zańdastyrý boıynsha kinásin moıyndap, bes jylǵa bas bostandyǵynan aıyryldy, dep habarlaıdy Kazinform menshikti tilshisi el prokýratýrasyna silteme jasaı otyryp.
Prokýratýra sot Garıbashvılıdi Grýzııa Qylmystyq kodeksiniń 194-babynyń 3-bóligi (asa iri kólemde aqsha jylystatý) boıynsha kináli dep tanyǵanyn atap ótti. Bas bostandyǵynan aıyrý jazasynan basqa, oǵan bir mıllıon ları aıyppul salyndy.
Prokýratýra Garıbashvılıdiń úıin tintý kezinde tárkilengen, qylmystyq áreket arqyly alynǵan aqsha memleket paıdasyna tárkilenetinin naqtylady. Burynǵy premer-mınıstr qylmysyn moıyndap, kináni moıyndaý týraly kelisimsharttarymen kelisti. Sot bul kelisim boıynsha prokýrordyń ótinishin maquldady.
Esterińizge sala keteıik, 22 qazanda Iraklıı Garıbashvılıden Sybaılas jemqorlyqqa qarsy agenttik jaýap aldy, onda ol tergeýmen tolyqtaı yntymaqtastyqta boldy jáne birneshe jyl boıy zańsyz tabys tapqanyn moıyndady.
Iraklıı Garıbashvılı Grýzııanyń eki ret — 2013 jyldan 2015 jylǵa deıin jáne 2021 jyldan 2024 jylǵa deıin — premer-mınıstri qyzmetin atqardy jáne kóptegen jyl boıy eldegi mańyzdy saıası tulǵa bolyp keldi.
Budan buryn Ashhabadtaǵy halyqaralyq forým aıasynda Qasym-Jomart Toqaev Grýzııa Premer-mınıstri Iraklıı Kobahıdzemen kezdeskenin jazdyq.