Grýzııanyń burynǵy qorǵanys mınıstri sybaılas jemqorlyq úshin 10 jylǵa bas bostandyǵynan aıyryldy
ASTANA. KAZINFORM — Grýzııada burynǵy qorǵanys mınıstri Djýansher Býrchýladze sybaılas jemqorlyq jáne aqshany jylystatý isi boıynsha 10 jylǵa bas bostandyǵynan aıyrý jazasyna kesildi, dep habarlaıdy News Georgia.
Tbılısı soty Býrchýladzeni qyzmet ókilettiligin teris paıdalaný jáne asa iri kólemde aqshany jylystatý boıynsha kináli dep tapty.
Sonymen qatar, onyń otbasynyń múlkin, sonyń ishinde Ispanııadaǵy vılla jáne Tbılısı mańyndaǵy Tsknetı kentindegi úıdi tárkileý týraly sheshim qabyldandy. Іs boıynsha keltirilgen zalal shamamen 8 mln larıge (3 mln dollardan astam) baǵalandy. Sondaı-aq oǵan eki jyl memlekettik qyzmette jumys isteýge tyıym salyndy.
Bul is basqalarmen qatar áskerı aýrýhanaǵa MRT-apparatyn satyp alýǵa baılanysty qozǵaldy. Tergeý nusqasy boıynsha, bir top sheneýnik básekelestikke jatpaıtyn jaǵdaı jasap, kelisimshart baǵasyn 1,3 mln larıge kótergen.
Osy is boıynsha basqa da aıyptalýshylar sottaldy. Qorǵanys mınıstriniń burynǵy orynbasary Georgıı Haındrava jáne eks-mınıstrdiń týysy Vasıl Mheıdzeniń segiz jylǵa bas bostandyǵynan aıyrý jazasyna kesildi. Tergeýmen kelisimge kelgen satyp alý departamentiniń burynǵy basshysy Vladımır Gýdýshaýrı tórt jylǵa shartty túrde bas bostandyǵynan aıyryldy. Oǵan aıyppul salynyp, qyzmetten ýaqytsha shettetildi.
Djýansher Býrchýladzeniń ózi qyzmet ókilettigin teris paıdalaný epızodtary boıynsha kinásin ishinara moıyndady, biraq aqshany jylystatý aıyptaryn joqqa shyǵardy. Ol úkim shyǵarý protsesine kelmedi, al onyń qorǵaýshylary úkimge shaǵymdaný nıetin málimdedi.
Býrchýladze Iraklıı Garıbashvılı úkimeti kezinde, 2021-2024 jyldary qorǵanys mınıstri qyzmetin atqardy. Garıbashvılı qańtar aıynda zańsyz kiristerdi zańdastyrý boıynsha kinásin moıyndap, bes jylǵa bas bostandyǵynan aıyryldy.
Al 2025 jyldyń naýryzynda Tbılısı qalalyq soty burynǵy prezıdent Mıhaıl Saakashvılıdi 9 mln ları (shamamen 3,2 mln dollar) kólemindegi bıýdjet qarajatyn jymqyrdy degen aıyppen 9 jylǵa bas bostandyǵynan aıyrdy.
