Grýzııalyq ınvestorlar Qazaqstanǵa $400 mln qarjy quıdy – Bektenov
ASTANA. KAZINFORM – Qazaqstan pen Grýzııa arasynda ınvestıtsııalyq áriptestik úrdisi artyp keledi. Bul týraly QR Premer-mınıstri Oljas Bektenov aıtty.
— Grýzııa — Qazaqstannyń mańyzdy ekonomıkalyq seriktesi. Osy oraıda eki el arasynda ınvestıtsııalyq áriptestik úrdisi artyp kele jatqanyn atap ótý kerek. Sońǵy 20 jyl ishinde grýzııalyq ınvestorlar Qazaqstan ekonomıkasyna 400 mln dollardan astam qarjy quıdy, óz kezeginde bizdiń eldiń kásipkerleri bul elge 620 mln dollardaı ınvestıtsııa saldy. Biz budan keıin de ınvestıtsııalyq áriptestikti arttyramyz jáne eldegi bıznes-ahýaldy jaqsarta túspekpiz, - dedi ol Grýzııa Premer-mınıstri Iraklıı Kobahıdzemen kelissóz barysynda.
Sondaı-aq Úkimet basshysy ózara saýda-sattyq kóleminiń artýy eki el arasyndaǵy yqpaldastyqtyń mańyzdy aspektisi ekenin atap ótti.
— Qazirgi álemdegi ahýalǵa jáne taýar jetkizýdiń jahandyq tizbeginiń túrlenýine qaramastan biz birlese otyryp eki eldiń saýda-sattyq qarym-qatynasyn arttyrmaqpyz. Biz Grýzııaǵa jetkiziletin taýarlar tizimine jańa shıkizattyq emes taýar túrleriniń qosylyp jatqanyna qýanyshtymyz, - dedi Oljas Bektenov.
Eske sala keteıik, ótken jyldyń sońynda Grýzııada Qazaqstannyń jańa Qurmetti konsýldyǵy ashylǵan bolatyn.