Grýzııaǵa demalýǵa baratyn qazaqstandyqtardyń sany artyp keledi
ASTANA. QazAqparat - Qazaqstannan Grýzııaǵa demalýǵa baratyn týrısterdiń sany jyldan jylǵa artyp keledi. Bul týraly QazAqparat tilshisiniń joldaǵan resmı saýalyna jaýap bergen QR SІM Halyqaralyq aqparat komıteti tóraǵasynyń mindetin atqarýshy Satybaldy Burshaqov habarlady.
Naqtyraq aıtqanda, QR Syrtqy ister mınıstrliginen 2017 jyldyń qorytyndysy boıynsha qazaqstandyqtar demalýǵa baratyn álem memleketteriniń bestigi suralǵan bolatyn. SІM bul suraq boıynsha QR Mádenıet jáne sport mınıstrliginiń Týrızm ındýstrııasy komıteti jaýapty ekenin aıta ketkenimen, qolda bar málimetterimen bólisken.
«Qolda bar aqparatqa sáıkes, qazaqstandyqtar negizinde dástúrli týrıstik elderge demalýǵa barady. Onyń ishinde TMD elderi, Túrkııa, BAÁ, Qytaı, Mysyr, Batys Eýropa, Ońtústik-Shyǵys Azııa elderi jáne t.b. Sondaı-aq, 2017 jyly 99 463 QR azamaty Birikken Arab Ámirlikterine baryp qaıtqan», - dep jaýap berdi QR SІM ókili.
Satybaldy Burshaqov habarlaǵandaı, TMD elderi ishinde Grýzııaǵa demalýǵa baratyndardyń sany kóbeıgen kórinedi.
«Grýzııaǵa týrıstik maqsatta keletin Qazaqstan azamattarynyń sany jyldan jylǵa ósýde. Mysaly, Grýzııa týrızm jónindegi ulttyq agenttiginiń aqparatyna sáıkes, 2017 jyly Grýzııaǵa 56 765 qazaqstandyq týrıster barǵan. Bul kórsetkish 2016 jylǵy kórsetkishtermen salystyrǵanda (48 849 adam) 16,2 paıyzǵa nemese 7 916 adamǵa ósken», - delingen jaýapta.
Foto: forum.awd.ru
