Grýzııadan kelgen halyqaralyq baıqaýshy alǵashqy Quryltaı saılaýynyń uıymdastyrý deńgeıin joǵary baǵalady
ASTANA. KAZINFORM – Grýzııa Ortalyq saılaý komıssııasynyń tóraǵasy Georgıı Kalandarıshvılı Qazaqstandaǵy alǵashqy Quryltaı saılaýynda daýys berýdiń uıymdastyrý deńgeıin joǵary baǵalady.
Onyń aıtýynsha, saılaý úderisiniń uıymdastyrylýynan alǵan alǵashqy áseri «óte jaǵymdy» bolǵan. Grýzııalyq baıqaýshy komıssııa músheleriniń kásibıligi men daıarlyǵyna, sondaı-aq daýys berý úderisiniń uıymdastyrylýyna erekshe nazar aýdardy.
— Saılaýdy ótkizýge jaýapty organnyń tóraǵasy retinde men bul úderiske, árıne, kásibı turǵydan qaraımyn. Rásimderdiń qanshalyqty naqty belgilenip, dáıekti túrde saqtalatynyna, ýchaskelik komıssııalardyń daıyndyǵyna, saılaýshylardyń óz quqyqtaryn erkin ári artyq kedergilersiz júzege asyra alýyna, úderistiń qanshalyqty ashyq jáne uıymdasqan túrde ótip jatqanyna erekshe nazar aýdaramyn, — dedi Georgıı Kalandarıshvılı.
Halyqaralyq baıqaýshy saılaý ýchaskesiniń ashylýyna qatysyp, komıssııanyń jumysqa daıyn ekenin atap ótti. Onyń baǵalaýynsha, barlyq rásim saqtalyp, azamattardyń daýys berýi úshin qajetti jaǵdaı jasalǵan.
Grýzııa Ortalyq saılaý komıssııasynyń basshysy ýchaskedegi atmosferaǵa da jeke toqtaldy. Onyń sózinshe, saılaý barysy ózara qurmetke negizdelgen.
— Saılaýshylardyń tanytyp otyrǵan qyzyǵýshylyǵy joǵary. Adamdardyń óz eliniń bolashaǵyn aıqyndaýǵa qatysýǵa múmkindigi men nıeti bolǵan kezde ǵana saılaýdyń máni bar. Bul rette daýys berýdiń beıbit ári ózara qurmet jaǵdaıynda ótýi mańyzdy. Sonda ár adam erkin ári sanaly tańdaý jasaı alady, — dep atap ótti ol.
Eki el arasyndaǵy yntymaqtastyq týraly aıta kele, ol Qazaqstan men Grýzııanyń saılaý organdary arasynda tájirıbe almasýǵa múmkindik bar ekenin atap ótti. Perspektıvalyq baǵyttardyń qatarynda saılaý tehnologııalaryn qoldaný, kıberqaýipsizdik, komıssııa múshelerin daıarlaý, azamattardy aqparattandyrý, logıstıka jáne saılaý úderisteriniń ashyqtyǵyn arttyrý bar.
Sóz sońynda Georgıı Kalandarıshvılı kásibı dıalog saılaýdy tıimdirek, qoljetimdi ári azamattarǵa túsinikti etýge, sondaı-aq qoǵamnyń saılaý júıesine degen senimin nyǵaıtýǵa múmkindik beretin sheshimderdi tabýǵa jol ashatynyna erekshe mán berdi.
Aıta ketelik elimizde tarıhı Quryltaı saılaýy ótip jatyr.
