Grýzııadan 143 Qazaqstan azamaty elge oralady – QR SІM

NUR-SULTAN. QazAqparat – Grýzııadaǵy Qazaqstan elshiliginiń uıymdastyrýymen 143 QR azamaty elge oralady, dep habarlaıdy QR SІM baspasóz qyzmeti.

«Koronavırýs pandemııasynyń kesirinen álemde bolyp jatqan aýyr ahýalǵa baılanysty búgin túnde Tbılısıden 143 Qazaqstan azamaty elge oralý úshin ushyp shyqty. Azamattardyń elge oralýyna Grýzııadaǵy QR Elshiligi atsalysty» delingen habarlamada.

QR SІM baspasóz qyzmetiniń málimdeýinshe, ushaqqa otyrǵyzý jáne tirkeý kezinde azamattardyń jaǵdaıy qalypty bolǵan.

«Kedendik jáne shekaralyq protsedýralar esh kedergisiz ótti. Jolaýshylar reıstiń keıinge shegerilýine túsinikpen qarady jáne charterlik reıs uıymdastyrylǵanyna alǵys bildirdi» dep málimdedi vedomstvo.