Grýzııadaǵy tártipsizdikke qatysqandar sany 39 adamǵa jetti

ASTANA. KAZINFORM –  Grýzııada 4 qazanda Tbılısıde bolǵan tártipsizdikke qatysqan taǵy segiz adam ustaldy, dep habarlaıdy TASS. 

Bul týraly eldiń ishki ister mınıstriniń orynbasary Aleksandr Darahvelıdze brıfıng barysynda málimdedi.

— Tergeý aıasynda júrgizilgen keshendi jedel jáne tergeý is-sharalary nátıjesinde quqyq qorǵaý organdary taǵy segiz adamdy ustady. Taǵy tórteýi izdeýde, — dedi ol.

Darahvelıdzeniń aıtýynsha, narazylyq bildirýshiler prezıdent rezıdentsııasyn basyp almaq bolǵan kezde polıtsııa qyzmetkerlerin qorlap, olarǵa tas jáne aýyr zattar laqtyrǵan. Osylaısha, jalpy ustalǵandardyń sany 39 adamǵa jetti.

Eske sala keteıik, 4 qazan kúni, jergilikti saılaý ótetin kúni, Tbılısı ortalyǵyndaǵy prezıdent saraıynyń mańynda jappaı narazylyq aktsııasy ótip, ol polıtsııamen qaqtyǵysqa ulasqan bolatyn.

Demonstranttar prezıdent saraıyn qorshaǵan tosqaýyldy buzyp ótti, alaıda arnaıy jasaq sý atqysh pen kózden jas aǵyzatyn gaz qoldana otyryp, olardy keri shegindirdi.

Polıtsııa bılikti qulatýǵa shaqyrý jáne toptyq zorlyq-zombylyq uıymdastyrý aıybymen narazylyq bastamashylarynyń beseýin ustady. Olarǵa toǵyz jylǵa deıin bas bostandyǵynan aıyrý jazasy qaýpi tónip otyr.