Grýzııadaǵy qazaqstandyqtardyń shaǵymyna qatysty is sheshimin tapty — SІM

ASTANA. KAZINFORM – Grýzııa shekarasynda QR azamattaryna dóreki qarym-qatynas jasaý deregine qatysty másele sheshimin tapty. Bul týraly QR Syrtqy ister mınıstrliginiń resmı ókili Aıbek Smadııarov aıtty.

Buǵan deıin áleýmettik jelilerde qazaqstandyqtar Grýzııanyń keden qyzmetkerleri men keıbir jergilikti turǵyndardyń dóreki qarym-qatynas kórsetkenin aıtyp, narazylyq bildirgen bolatyn. Qazaqstan-Grýzııa ekonomıkalyq odaǵy da bul máselege qatysty alańdaýshylyq tanytty.

Aıbek Smadııarovtyń aıtýynsha, shaǵym túskennen keıin QR SІM jedel túrde áreket etip, birden konsýldyq deńgeıde keńester uıymdastyrǵan. Kelissóz júrgizý úshin mınıstrlik ókilderi birden Grýzııaǵa attanǵan. Onyń aıtýynsha, grýzın tarapy óz eliniń qaýipsizdigin qamtamasyz etýge jiti nazar aýdarady jáne osyǵan baılanysty keıbir jaǵdaılarǵa qatysty talap qatań.

— Múmkin, osy talaptarǵa bizdiń týrıster de ilikken bolar. Biraq endi olar (grýzın tarapy – red.) shekara jáne keden qyzmeti ókilderimen áńgimelesip, tıisti nusqaý berýge ýáde etti. Osylaısha biz grýzın tarapymen ózara túsinistikke qol jetkizdik. Eger taǵy qandaı da bir jaǵdaı bola qalsa, árbir oqıǵany jeke qarastyratyn bolamyz, — dedi resmı ókil.

Aıta keteıik, buǵan deıin SІM Reseı shekarasyndaǵy jańa talaptarǵa qatysty pikir bildirdi.