Grýzııada jolaýshylar toly kólik tik jardan qulap, birneshe adam qaza tapty

NUR-SULTAN. QazAqparat - Grýzııanyń bıik taýly aýmaǵyndaǵy Zemo Alvanı eldi mekeniniń turǵyndaryn Omalo aýylyna apara jatqan júk kóligi tik jardan qulap, kem degende bes adam qaza tapty, dep habarlady senbi kúni IMEDI telekompanııasy.

Telekompanııanyń derekterine qaraǵanda, júk kóligi adamdardy aýyldyq merekege apara jatqan. Qaǵa beris sátte júrgizýshi rýlge ıe bola almaı, mashına bıiktigi 400 metrge jetetin tik jardan qulaǵan. Júk avtomobılinde 12 adam bolǵan, olardyń beseýi sekirip úlgergen.

Oqıǵa ornynda qutqarýshylar jumys isteýde. Іzdeý-qutqarý operatsııasyna Grýzııa ІІM shekaralyq polıtsııasynyń tikushaǵy tartylǵan. Ol ajaldan aman qalǵan birneshe jolaýshyny Telavı qalasynyń (Kahetı ólkesi) aýrýhanasyna jetkizdi.