Grýzııada jolaýshylar tasymalynyń rekordtyq ósimi tirkeldi

ASTANA. KAZINFORM — 2025 jyldyń qańtar-tamyz aılary aralyǵynda Grýzııa áýejaılary 5 635 975 jolaýshyǵa qyzmet kórsetti, bul ótken jyldyń sáıkes kezeńimen salystyrǵanda 14%-ǵa kóp, dep habarlaıdy Business Media. 

Grýzııa áýejaılary qaýymdastyǵynyń málimeti boıynsha osy kezeńde eldiń úsh halyqaralyq áýejaıy aptasyna orta eseppen shamamen 700 reısti oryndaǵan. Segiz aıda barlyǵy 24 myńnan astam halyqaralyq jáne ishki reıs oryndaldy, bul ótken jylmen salystyrǵanda 15%-ǵa kóp.

Grýzııa Túrkııamen eń belsendi áýe qatynasyn qamtamasyz etip otyr. Ótken jyldyń ózinde eki el arasynda 1,2 mln-nan astam jolaýshy júrip ótken, bul kórshi memlekettermen jalpy jolaýshy tasymalynyń 47 paıyzyn quraıdy.

2 qazanda túriktiń AJet bıýdjettik áýe kompanııasy Ankara-Tbılısı-Ankara baǵyty boıynsha alǵashqy tikeleı reısin ashty. Tasymaldaýshy aptasyna tórt reıs oryndaýdy josparlap otyr.

Qaýymdastyqtyń málimdeýinshe, jolaýshylar aǵynynyń ulǵaıýy jáne baǵyt jelisiniń keńeıýi eldiń kólik qoljetimdiligin jáne halyqaralyq baılanystardy qamtamasyz etýde mańyzdy ról atqaratyn Grýzııanyń avıatsııa salasynyń turaqty damýyn kórsetip otyr.

2025 jyldyń ekinshi toqsanynda Grýzııaǵa 1,8 mıllıon sheteldik azamat kelgen. Bul kórsetkish ótken jyldyń sáıkes kezeńimen salystyrǵanda 6,9 paıyzǵa joǵary boldy. 

Sonymen birge, 2025 jylǵy 1 qazannan bastap Grýzııada shetel azamattarynyń elde bolý merzimin buzǵany úshin jaýapkershilikti kúsheıtetin jáne kóshi-qon úderisterin qatań baqylaýdy kózdeıtin jańartylǵan erejeler kúshine enedi.