Grýzııada jol qurylysy kezinde tórt sheteldik jumysshy qaza tapty

ASTANA. KAZINFORM — Kveshetı-Kobı tasjolynyń Grýzııa-Reseı shekarasyna aparatyn bóliginde qurylys jumystary kezinde jazataıym oqıǵa bolyp, saldarynan tórt sheteldik jumysshy qaza tapty, dep habarlaıdy Grýzııanyń avtomobıl joldary departamenti. 

Vedomstvonyń málimetinshe, tireýish qabyrǵany salý kezinde topyraq opyrylyp qalǵan. Qulaǵan topyraq astynda qurylys kompanııasynyń bes qyzmetkeri Túrikmenstan men Qytaı azamattary qalǵan. Oqıǵa ornynan qaza tapqan tórt adamnyń denesi tabyldy, al jaraqat alǵan bir adam aýrýhanaǵa jetkizildi.

Qutqarý qyzmetteri men Joldar departamentiniń ókilderi Tskere aýylynyń mańynda jumysyn jalǵastyryp jatyr. Grýzııa Іshki ister mınıstrligi oqıǵanyń barlyq mán-jaıyn anyqtaý úshin tergeý amaldaryn bastady.

Kveshetı-Kobı tasjoly — eldiń iri ınfraqurylymdyq jobalarynyń biri. Ony iske asyrý jol qozǵalysy qaýipsizdigin arttyrýǵa jáne Grýzııa-Reseı shekaralyq baqylaý beketine aparatyn ýchaskede jyl boıy kólik qozǵalysyn qamtamasyz etýge baǵyttalǵan. Jol sonymen qatar memlekettiń tranzıttik áleýetin arttyrýǵa arnalǵan jáne týrıster arasynda tanymal bolmaq.

Jobanyń quny 1,24 mlrd ları (shamamen 460 mln dollar).

Birneshe jyl buryn Grýzııadaǵy Rıkotı asýynda jańa jol salý kezinde Qytaı azamaty qaza tapty. Al bir jyl buryn Reseı shekarasyna jaqyn jerdegi Kobı aýylynyń mańyndaǵy qurylys alańynda qytaılyq jumysshy qaza tapqan edi.

Buǵan deıin Shymkentte qurylys alańynda jumysshy qaza tapqanyn jazǵan bolatynbyz.