Grýzııada joǵalyp ketken qazaqstandyqty izdeýge eriktiler qarajat jınady

ASTANA. QazAqparat - Eriktiler shamamen eki aı buryn Grýzııada joǵalyp ketken qazaqstandyqty izdeýmen aınalysatyn arnaıy topty jaldaýǵa qajet 3 myń dollardy jınady.

«Balalar, úlken raqmet! Barlyǵymyzdyń kúsh salýymyzben qajetti qarajat jınaldy, endi Sergeı Trofımovty izdeýge arnaıy topty jibere alamyz. Top jumysy týraly keıinirek habardar etip otyramyz», - dep jazdy Sergeıdiń dosy Ánýar Dúısenbınov óziniń Facebook paraqshasyna.

Aıta keteıik, áleýmettik jelide eń alǵash Á.Dúısenbınov dabyl qaqty. Onda 23 shildeden beri Sergeımen baılanysa almaı otyrǵanyn aıtty. Ánýardyń aıtýynsha, 6 shilde kúni Qazaqstan men Reseıge avtokólikpen saıahat jasap júrgen Sergeı Grýzııaǵa barǵan jáne shamamen 13 shildege deıin Tbılısıde bolǵan. Baılanys úzilgenshe Sergeı Grýzııadaǵy Borjomı, Kýtaısı, Svanetıı, Mestııa jáne Ýshgýlıde bolǵan.

17 tamyz kúni Ánýar Dúısenbınov bılikten kúder úzgenin, jeke izdeýshilerdi jaldaýǵa qarajat jınaýdy bastaǵanyn habarlady.

QR Syrtqy ister mınıstrliginiń málimetterine súıensek, S.Trofımov týraly jańa aqparattar kelip túsken joq.