Grýzııada jappaı narazylyq bildirgender parlament ǵımaratyna shabýyl jasady
TBILISI. QazAqparat - Tbılısı polıtsııasy Grýzııa parlamentiniń aldyna jınalǵan kóterilisshilerdi taratý úshin rezeńke oq pen kózdi jasaýratatyn gaz qoldandy, dep habarlaıdy «QazAqparat» HAA álemdik aqparat kózderine silteme jasap.
Jappaı narazylyq beısenbi kúni, 20 maýsymda Reseı delegatsııasynyń Pravoslavıe parlamentaralyq Bas assambleıasyna qatysýyna baılanysty bastaldy. Delegatsııany basqarýshy jáne ASM basshysy RF memlekettik dýmasynyń depýtaty Sergeı Gavrılovtyń sessııa kezinde Grýzııa parlamenti spıkeriniń kreslosyna otyryp, jınalǵandarǵa orys tilinde sóılegeni oppozıtsııanyń narazylyǵyn týdyrǵan. Grýzııanyń oppozıtsııalyq depýtattary muny qorlaý dep baǵalap narazylyqtaryn bildirip, Bas assambleıanyń jumysyn toqtatty.
Euronews málimetinshe, sherýshiler Grýzııa ІІM basshysy Georgıı Gaharııa men spıker Iraklıı Kobahıdzeniń otstavkaǵa ketýin, sondaı-aq kezekten tys parlament saılaýy ótkizilýin talap etip, parlament ǵımaratyna birneshe ret shabýyl jasaǵan.
Grýzııa Іshki ister mınıstri Georgıı Gaharııa sherýshilerdi polıtsııaǵa baǵynýǵa shaqyrdy, dep habarlaıdy TASS.
«Men eń aldymen alańda turǵan ár azamatty, múmkin olar ádiletti narazylyq bildirip turǵan bolar, polıtsııa talaptaryna baǵynýǵa shaqyramyn. Munda bolyp jatqannyń barlyǵy memlekettik ınstıtýttarǵa shabýyl sanalady», - dedi ol beısenbi kúni jýrnalısterge bergen suhbatynda.
Narazylyqqa shyqqandarǵa qarsy kózdi jasaýratatyn gaz ben rezeńke oqtar qoldanyldy. Grýzııa baspasózi birneshe adamnyń aýyr jaraqat alǵanyn habarlady.
Grýzııa Densaýlyq saqtaý mınıstrliginiń málimetinshe, barlyǵy 52 adam zardap shekken, olardyń 38-i - polıtsııa qyzmetkerleri.
Keshkisin S.Gavrılov jáne basqa da Memlekettik dýmanyń depýtattary Tbılısıden ushyp ketti.
