Grýzııada zańsyz krıptomaınıngke qarsy reıdter júrgizilip jatyr
ASTANA. KAZINFORM — Grýzııanyń quqyq qorǵaý organdary Svanetııa óńirinde zańsyz krıptomaınıngke qarsy aýqymdy reıd bastady. Operatsııa barysynda Mestııa mýnıtsıpalıtetinde krıptovalıýta óndirýge arnalǵan shamamen 150 qurylǵy tárkilendi, dep habarlaıdy Kazinform agenttiginiń óńirdegi menshikti tilshisi.
Grýzııa Іshki ister mınıstrliginiń málimetinshe, tergeý áreketteri bir mezgilde alty nysanda júrgizilgen. Quqyq qorǵaýshylar tsıfrlyq aktıvter óndirý úshin paıdalanylǵan arnaıy jabdyqtardy anyqtady. Bul qurylǵylar elektr energııasynyń edáýir kólemin tutynǵan.
— Tergeý atalǵan qurylǵylardyń kómegimen jergilikti turǵyndardyń tsıfrlyq valıýta óndirip, elektr energııasyn zańsyz ári kóp kólemde paıdalaný arqyly turaqty túrde zańsyz tabys tapqanyn anyqtady, — dep málimdedi Іshki ister mınıstrligi.
Tárkilengen jabdyqtar zattaı aıǵaq retinde tanyldy. Tergeý bul shemaǵa qatysy bolýy múmkin ózge tulǵalardy anyqtaý jumysyn jalǵastyryp jatyr.
Іs energetıkalyq resýrstardy paıdalaný qaǵıdalaryn buzý baby boıynsha tergelip jatyr. Atalǵan bap boıynsha úsh jylǵa deıin bas bostandyǵynan aıyrý jazasy qarastyrylǵan.
Sońǵy jyldary Svanetııadaǵy zańsyz krıptomaınıng máselesi Grýzııanyń energetıkalyq júıesi úshin eń ózekti problemalardyń birine aınaldy. Óńir turǵyndary taýly aýdandarǵa arnalǵan memlekettik jeńildik aıasynda elektr energııasyn tegin alady. Alaıda bul kóleńkeli maınıngtiń kúrt ósýine jáne elektr jelileriniń shamadan tys júktelýine sebep bolǵan.
Úkimet derekterine sáıkes, 2025 jyly Mestııa shamamen 133 mıllıon kılovatt-saǵat elektr energııasyn tutynǵan. Bul kórsetkish eldegi kóptegen basqa mýnıtsıpalıtetterden aıtarlyqtaı joǵary. Bılik ókilderi energetıkalyq júıege keletin jyl saıynǵy shyǵyndy 7,3–9,1 mıllıon AQSh dollary kóleminde baǵalap otyr.
Eske sala keteıik, 1 maýsymda quqyq qorǵaý organdarynyń qyzmetin úılestirý máseleleri jónindegi memlekettik mınıstr Mamýka Mdınaradze zańsyz krıptomaınıngke qarsy júıeli kúres bastalǵanyn jarııalaǵan bolatyn. Bılik elektr energııasyn esepteıtin quraldardy ornatyp, tegin tutynýǵa lımıt engizýdi josparlap otyr. Belgilengen normadan asqan jaǵdaıda turǵyndar elektr qýaty úshin tarıf boıynsha aqy tóleıdi.
Buǵan deıin Reseıde krıptovalıýtanyń zańsyz aınalymy úshin jaýapkershilikti kúsheıtý sharalary qolǵa alynǵany habarlanǵan edi.
