Grýzııada V–VI ǵasyrlarǵa tıesili kóne saraı tabyldy
ASTANA. KAZINFORM – Grýzııa arheologtary Marneýlı mýnıtsıpalıtetinen V–VI ǵasyrlarǵa jatatyn kóne saraıdyń qaldyqtaryn tapty. Aldyn ala boljam boıynsha, ǵımarat jergilikti bıleýshige nemese aqsúıekter áýletiniń ókiline tıesili bolǵan, dep habarlaıdy TASS agenttigi.
Bul týraly Grýzııanyń Mádenı murany qorǵaý jónindegi ulttyq agenttigi málimdedi.
Arheologııalyq qazba jumystary Marneýlı mýnıtsıpalıtetine qarasty Meore Kesalo aýylynda júrgizilip jatyr. Tabylǵan nysan ózen mańyndaǵy jarqabaqtyń shetinde ornalasqan ejelgi ǵımarat qabyrǵalarynyń alasa irgetasynan turady. Mamandardyń aldyn ala baǵalaýynsha, bul jergilikti bıleýshiniń nemese ataqty áýlet ókiliniń saraıy bolǵan.
Qazir keshenniń jańa ýchaskelerinde arheologııalyq zertteý jumystary jalǵasyp jatyr. Mamandar qabyrǵalardy, shatyr jabyndysynyń taqtaıshalary jatqan qabattardy jáne kóne bólmelerdiń edenderin tazartýdy josparlap otyr.
Saraıdy zertteýge qatysyp jatqan arheolog Davıd Mındorashvılıdiń aıtýynsha, ǵımarat birneshe bólmeden, dálizder men qoıma oryndarynan turǵan. Sondaı-aq ol biryńǵaı jospar boıynsha salynǵan.
Arheologtyń atap ótýinshe, Grýzııada buǵan deıin mundaı aýqymdaǵy saraı tabylmaǵan.
Eske sala keteıik, buǵan deıin Germanııada kól túbinen ejelgi qonystyń izderi tabylǵan edi.