Grýzııada Ulttyq gastronomııa agenttigi quryldy
ASTANA.KAZINFORM — Grýzııada 2026 jylǵy 20 shildeden bastap Qorshaǵan ortany qorǵaý jáne aýyl sharýashylyǵy mınıstrligi júıesinde jumysyn bastaıtyn Ulttyq gastronomııa agenttigin qurý týraly sheshim qabyldandy. Tıisti qaýlyny el úkimeti bekitti, dep habarlaıdy Kazinform agenttiginiń óńirdegi menshikti tilshisi.
Vedomstvonyń málimetinshe, jańa qurylym eldiń gastronomııalyq murasyn saqtaý, damytý jáne halyqaralyq deńgeıde ilgeriletý, sondaı-aq osy salada biryńǵaı memlekettik saıasat qalyptastyrý maqsatynda qurylyp otyr.
Agenttiktiń negizgi mindetterine ulttyq aspazdyq dástúrlerdi zertteý jáne nasıhattaý, dástúrli ónimderdi quqyqtyq qorǵaý tetikterin jetildirý, memlekettik qurylymdar men sala ókilderiniń ózara is-qımylyn úılestirý, sondaı-aq ishki jáne syrtqy naryqtarda otandyq ónimniń básekege qabilettiligin arttyrý kiredi.
Eldiń materıaldyq emes mádenı muralar tizimine engizilgen dástúrli ónimderdi saqtaý men qorǵaýǵa erekshe nazar aýdarylady. Olardyń qatarynda qysh qumyra — kvevrıde sharap óndirý tehnologııasy, dástúrli tenılı irimshigi, chýrchhela, dambalhacho jáne ulttyq gastronomııalyq muranyń bir bóligi sanalatyn ózge de ónimder bar.
Sondaı-aq Grýzııa sharap jasaýdyń eń kóne elderiniń biri sanalady. Bul kásiptiń tarıhy shamamen segiz myń jyldy qamtıdy. Bul faktor halyqaralyq naryqtaǵy eldiń mańyzdy artyqshylyǵy retinde qarastyrylyp otyr.
Grýzııa tarapynyń baǵalaýynsha, jańa agenttiktiń qyzmeti jergilikti óndirýshilerdi qoldaýǵa, aýyl turǵyndarynyń tabysyn arttyrýǵa, gastronomııalyq týrızmdi odan ári damytýǵa jáne ulttyq ónimniń eksporttyq áleýetin nyǵaıtýǵa yqpal etedi.
Buǵan deıin Grýzııanyń grýzın larıiniń tsıfrlyq balamasy — GELt shyǵarýdy josparlap otyrǵany habarlanǵan edi.
Aıta ketelik Grýzııa neke arqyly elde turýǵa ruqsat alý erejelerin qatańdatqan edi.
