Grýzııada ulttyq aza tutý jarııalandy

ASTANA. KAZINFORM – Grýzııada patrıarh Ilııa II-niń qaıtys bolýyna baılanysty ulttyq aza tutý kúni jarııalandy. Bul týraly grýzııalyq «Interpressnıýs» agenttigi jazdy.

Úkimettiń málimetine súıensek, el boıynsha barlyq ákimshilik ǵımarattarda memlekettik týlar tómen túsirilgen. 

Grýzın pravoslavıe shirkeýi basshysynyń qaıtys bolǵanyn búkil Grýzııanyń Katolıkos-Patrıarhynyń mindetin atqarýshy, mıtropolıt Shıo habarlaǵan.

— Búkil Grýzııanyń Katolıkos-Patrıarhy, qasıetti ári mártebeli Ilııa II qaıtys boldy. Ol — tutas bir dáýirdiń tulǵasy edi. Onyń dúnıeden ótýi búkil pravoslav álemi úshin orny tolmas qaıǵy, — dep málimdedi ol.

Patrıarh Ilııa II 94 jasynda Tbılısı qalasyndaǵy Kavkaz medıtsınalyq ortalyǵynda kóz jumdy. Ol densaýlyǵynyń kúrt nasharlaýyna baılanysty aýrýhanaǵa jatqyzylǵan. Aýrýhanada premer-mınıstr Iraklıı Kobahıdze bastaǵan úkimet músheleri, sondaı-aq Grýzııa prezıdenti Mıhaıl Kavelashvılı bolǵan.

Patrıarhııanyń qoǵammen baılanys qyzmetiniń basshysy Andrııa Djagmaıdze patrıarh Ilııa II-niń dene Tbılısıdegi Qasıetti Úshtik soboryna jerlenetinin málimdedi. Jerleý orny men ózge de málimetter keıinirek qosymsha jarııalanady.

Densaýlyq saqtaý mınıstri Mıhaıl Sardjveladze patrıarhtyń aýrýhanaǵa aldyńǵy túni jetkizilgenin naqtylady. Onyń aıtýynsha, ólimge búırek, ókpe jáne júrek jetkiliksizdiginen týyndaǵan asqynýlar sebep bolǵan. Naýqas klınıkaǵa asqazannan qan ketý jaǵdaıymen túsip, jansaqtaý bólimine jatqyzylǵan.

Aıta keteıik, ótken aıda Ońtústik Koreıanyń eks-premeri Lı He Chhan qaıtys bolǵanyn jazdyq.

Grýzııanyń burynǵy premer-mınıstri bes jylǵa bas bostandyǵynan aıyryldy.