Grýzııada turyp jatqan qazaqstandyqtar eldegi qazirgi jaǵdaı týraly aıtty

ASTANA.KAZINFORM - Jappaı sherý bolyp jatqan Grýzııada júrgen qazaqstandyqtar eldegi qazirgi jaǵdaı týraly aıtty. Bul týraly Kazinform tilshisi habarlady.

Grýzııada turatyn Qazaqstan azamaty Arman (aty ózgertildi — avt.) Tbılısıdegi jaǵdaı turaqty ekenin aıtty. Onyń aıtýynsha, qalanyń ortalyq bóliginde ǵana adamdar alańǵa shyǵyp qarsylyq bildirip jatyr, al basqa aýdardar qozǵalys úshin qaýipsiz.

Tbılısıde turatyn taǵy bir otandasymyz Arsen Alpysbaı sherýler jeke adamdar úshin qaýip-qater týǵyzbaıdy deıdi.

— Eldegi atmosfera týraly aıtatyn bolsaq, men eshqandaı qaýip sezinbeımin, óıtkeni adamdar narazylyq bildirip, óz bolashaǵy úshin kúresip jatyr. Jalpy, mundaǵy turǵyndardyń bári bizge jaqsy qaraıdy, bári tynysh, jumysta eshqandaı qysym sezinbeımin. Biz bárimiz grýzın halqyn qoldaımyz, — dep bólisti ol.

Esterińizge sala keteıik, Grýzııada eldi eýroıntegratsııa kýrsyna qaıtarýdy talap etken jappaı narazylyq aktsııalary altynshy kún qatarynan jalǵasyp jatyr. Ol týraly Kazinform tilshisiniń sholý materıalynan tolyq oqýǵa bolady.

Sondaı-aq, buǵan deıin Qazaqstan Respýblıkasynyń Syrtqy ister mınıstrligi Grýzııadaǵy qazaqstandyqtardyń konsýldyqtar kómegine júginbegenin habarlaǵan bolatyn.