Grýzııada Stalınniń eskertkishi qulatyldy
ASTANA. 2 qańtar. QazAqparat - Grýzııanyń Telavı qalasynda Ekinshi dúnıejúzilik soǵysta qaza bolǵandardy eske alýǵa arnalǵan memorıaldy taqtanyń janyna ornatylǵan Iosıf Stalınniń eskertkishi alynyp tastaldy.
Grazııalyq BAQ-tar habarlaǵandaı, eskertkishti alyp tastaýdy jergilikti ákimshilik sheshti. Ákimdik zańsyz ornatylǵan eskertkishti bólshektep, odan basqa zat jasap shyǵarýǵa tender jarııalady.
«Stalınıst» qoǵamdyq uıymynyń jetekshisi Shota Lazarıashvılı jergilikti bıliktiń bul áreketin vandalızm dep atady. «Úkimet keledi de ketedi, al Stalın qalady», - dep málimdedi ol.
Stalınniń eskertkishi ótken jyldyń 1 qyrkúıeginde saltanatty túrde ashylǵan. Oǵan joǵaryda atalǵan qoǵamdyq uıym men Grýzııanyń Aradagerler odaǵy muryndyq boldy. Alaıda artynan belgili bolǵandaı, eskertkish zańsyz, eshqandaı ruqsatsyz ornatylǵan eken.
