Grýzııada sheteldik týrıster úshin elge kirýdiń erejeleri kúshine endi
ASTANA. KAZINFORM — Grýzııa 2026 jyldan bastap barlyq sheteldik týrıster úshin mindetti medıtsınalyq saqtandyrýdy engizdi. Polıci joq azamattarǵa aıyppul nemese elge kirýge tyıym salynady, dep habarlaıdy eldiń Ulttyq týrızm ákimshiligi.
2026 jyldyń 1 qańtarynan bastap Grýzııa barlyq sheteldik azamattardyń elge kirgen kezde medıtsınalyq saqtandyrýy bolýyn talap etetin jańartylǵan saıasatty engizdi. Jaramdy saqtandyrý polısiniń bolmaýy endi rásimdilik bolyp sanalmaıdy.
Elge saqtandyrýsyz kirgen tulǵalarǵa 300 ları (shamamen 110 dollar) aıyppul salynady. Budan basqa, saıahatshyǵa elge kirýge ruqsat berilmeýi múmkin.
Talap etilgen polıs shuǵyl ambýlatorııalyq kómek úshin keminde 5 myń AQSh dollarǵa shuǵyl ambýlatorııalyq kómekti, jáne jazataıym oqıǵalar, jaraqattar, kenetten bolatyn aýrýlar jáne medıtsınalyq evakýatsııalaý úshin keminde 30 myń AQSh dollar tólenýin qamtamasyz etýi tıis.
Saqtandyrý shekaradan ótken sátten bastap resimdelýi jáne elde bolý merziminiń sońyna deıin jaramdy bolyp qalýy tıis. Shekara qyzmetteri bul qujatty áýejaılarda da, qurlyqtaǵy shekaradan ótý pýnktterinde de suraı alady.
Bastapqyda zań 2024 jyldyń 1 maýsymynda kúshine enýi tıis edi, biraq ony júzege asyrý 2026 jyldyń 1 qańtaryna deıin keıinge qaldyryldy.
Buǵan deıin 2025 jylǵy 1 qazannan bastap Grýzııada shetel azamattarynyń elde bolý merzimin buzǵany úshin jaýapkershilikti kúsheıtetin jáne kóshi-qon úderisterin qatań baqylaýdy kózdeıtin jańartylǵan erejeler kúshine engenin jazǵan bolatynbyz.
Sondaı-aq Grýzııanyń týrızmnen túsken tabysy 6,6 paıyzǵa ósip, 1,66 mlrd dollarǵa jetkenin jazdyq.