Grýzııada sheteldik agentter týraly zańǵa qarsy sherýler kezinde 20-ǵa jýyq adam ustaldy

ASTANA. KAZINFORM – Seısenbi kúni Tbılısıde parlament ǵımaratynyń aldynda sheteldik agentter týraly zańǵa qarsy sherýler ótti. Mıtıng polıtsııamen qaqtyǵysqa ulasyp, sonyń barysynda polıtsııanyń bir qyzmetkeri jaraqat aldy. Narazylyq bildirgen 20-ǵa jýyq adam ustaldy, dep habarlaıdy TASS aqparat agenttigi. 

Arnaıy jasaq kózden jas aǵyzatyn gaz qoldanyp, parlamenttiń qyzmettik kireberisin basyp alýǵa árekettengen narazylyq bildirýshilerdi keri qýýǵa májbúr boldy. Keıin Tbılısıde sheteldik agentter týraly zań jobasyna qarsy shyqqandar parlament ǵımaratyna kirip-shyǵatyn esiktiń aýmaǵyn tolyǵymen bosatqan. 

Sodan keıin polıtsııa qorshaýdy alyp, zań shyǵarýshy organ ǵımaratyna irgeles barlyq kóshelerdi jaýyp tastady. 100-den astam narazylyq bildirýshiler jınalǵan sońǵy núkte parlament jaǵyndaǵy Chıchınadze kóshesinde boldy, alaıda polıtsııa kósheni qorshaýdan shyǵarǵannan keıin olar parlamenttiń negizgi kireberisi ornalasqan Rýstavelı dańǵylyna túsip, sosyn tarady.

Narazylyq bildirýshilerdiń aıtýynsha, olar zań shyǵarýshy organ sheteldik agentter týraly zań jobasyn qaraýdy jalǵastyratyn bolsa, qaıta jınalýdy josparlap otyr.

Sáýir aıynyń basynda bıliktegi «Grýzın armany – demokratııalyq Grýzııa» partııasy «Sheteldik yqpaldyń ashyqtyǵy týraly» zań jobasyn parlamentke qaıta engizý týraly sheshimin jarııalady. Bul osyǵan uqsas bastama bılikti ony qabyldaýdan bas tartýǵa májbúrlegen jappaı narazylyqtarǵa ákelgennen keıin bir jyldan soń oryn aldy. Zań jobasynyń mátini «sheteldik yqpal agenti» termınin qospaǵanda, byltyrǵydaı ózgerissiz qaldy. Onyń ornyna «sheteldik derjavanyń múddesin kózdeıtin uıym» uǵymy qoldanyldy.

Zań jobasyna el prezıdenti Salome Zýrabıshvılı de, oppozıtsııa da, dıplomatııalyq korpýs ta qarsy boldy. Bastamaǵa qarsy shyqqandardyń pikirinshe, bul zań jobasy Grýzııanyń Eýroodaqpen ıntegratsııalanýyna kedergi keltiredi.