Grýzııada shetel azamattarynyń biryńǵaı tizilimi iske qosylady
ASTANA. KAZINFORM – Grýzııada 2026 jylǵy 1 qyrkúıekten bastap Shetel azamattarynyń biryńǵaı tizilimi jáne el aýmaǵynda zańsyz júrgen nemese buryn zańsyz bolǵan sheteldikterdiń derekqory qurylady. Bul týraly Kazinform agenttiginiń óńirdegi menshikti tilshisi JNews-ke silteme jasap habarlaıdy.
Tıisti ózgerister «Shetel azamattary men azamattyǵy joq adamdardyń quqyqtyq mártebesi týraly» zańǵa engizilgen túzetýlerde kózdelgen.
Jańa tártipke sáıkes, Biryńǵaı tizilim shetel azamattary men olardyń quqyqtyq mártebesine qatysty biryńǵaı aqparattyq qor qalyptastyrý úshin qurylady. Ony Grýzııa Ádilet mınıstrligine qarasty Memlekettik qyzmetterdi damytý agenttigi júrgizedi.
Tizilimdi júrgizý tártibi, ondaǵy málimetterdi, onyń ishinde bıometrııalyq derekterdi óńdeý jáne memlekettik organdar arasynda aqparat almasý qaǵıdalary Úkimet qaýlysymen bekitiledi.
Sonymen qatar memlekettik jáne qoǵamdyq qaýipsizdikti, quqyqtyq tártipti qamtamasyz etý maqsatynda Grýzııanyń Іshki ister mınıstrligi elde zańsyz júrgen nemese buryn zańsyz bolǵan shetel azamattaryna qatysty jeke derekqor jasaqtaıdy.
Bul derekqordaǵy málimetter kópshilikke qoljetimdi bolmaıdy. Ony qalyptastyrý, júrgizý, aqparatty óńdeý jáne ózge memlekettik organdarmen almasý tártibin Іshki ister mınıstri belgileıdi.
Buǵan deıin Grýzııa Іshki ister mınıstriniń orynbasary Aleksandr Darahvelıdze Biryńǵaı tizilim qurý jospary týraly málimdegen bolatyn.
Onyń aıtýynsha, jańa júıe shetel azamattarynyń elge kelýin, tirkelýin jáne memlekettik qyzmetterdi paıdalanýyn tıimdirek baqylaýǵa múmkindik beredi. Sondaı-aq zańsyz kóshi-qonmen kúresti kúsheıtýge yqpal etedi.
Osyǵan deıin Grýzııa neke arqyly elde turýǵa ruqsat alý erejelerin qatańdatty.
