Grýzııada ruqsatsyz jumys istegender 5 jylǵa deıin elden shyǵarylýy múmkin
ASTANA. KAZINFORM — Grýzııada zańdy jumys isteý quqyǵynsyz eńbek etý olardy elden shyǵarýǵa negiz bola alady. Bul týraly QR Syrtqy ister mınıstrliginiń resmı ókili Janbolat Úsenov aptalyq brıfıngte málim etti.
— 2026 jylǵy qyrkúıek aıynan bastap Grýzııada zańsyz jumys istegen shetel azamattary elden shyǵarylady. QR azamattary úshin Grýzııaǵa vızasyz kirý jáne onda 365 kúnge deıin bolý rejımi saqtalady, — dedi QR SІM resmı ókili.
Janbolat Úsenovtyń aıtýynsha, vızasyz rejım elge kirýge jáne onda bolýǵa quqyq beretinin, alaıda eńbek qyzmetin júzege asyrýǵa quqyq bermeıtinin eskerý qajet.
— Tıisti ruqsatsyz aqyly eńbek etý ákimshilik jaýapkershilikke ákep soǵady. Shetel azamaty elden shyǵarylǵan jaǵdaıda oǵan Grýzııa aýmaǵyna qaıta kirýge 2 jyldan 5 jylǵa deıin tyıym salynýy múmkin. Osyǵan baılanysty Grýzııada jumysqa ornalasýdy, kásipkerlik qyzmetpen nemese ózge de aqyly qyzmetpen aınalysýdy josparlap otyrǵan Qazaqstan azamattaryna Grýzııa zańnamasymen aldyn ala tanysýǵa qatań keńes beriledi, — dedi Janbolat Úsenov.
Aıta ketelik Grýzııada shetel azamattarynyń biryńǵaı tizilimi iske qosylatyny týraly jazǵan edik.
