Grýzııada Reseı shekarasyna baratyn joldaǵy 426 metrlik kópir salyndy
ASTANA. KAZINFORM — Grýzııada Reseı shekarasyna aparatyn Jınvalı-Larsı jolynyń bóligi Kveshetı-Kobı tas jolyndaǵy kúrdeli ınjenerlik qurylys aıaqtalýǵa jaqyn, dep habarlaıdy Kazinform agenttiginiń aımaqtaǵy menshikti tilshisi.
426 metrlik arkaly kópir 166 metr bıikte ornalasqan.
Grýzııa avtomobıl joldary departamentiniń málimeti boıynsha, áli qurylys jumystary júrip jatyr. Kópir 23 shaqyrymdyq Kveshetı-Kobı jobasynyń eń kúrdeli bóligi. Kópir arkasynyń ózi 285 metr. Joba materıaldaryna súıensek, buǵan deıin Grýzııada mundaı kúrdeli ınjenerlik qurylys salynbaǵan.
Joba aıasynda bes kópir men bes týnnel salynady, sondaı-aq qoldanystaǵy bir kópir qaıta salynady. Týnnelderdiń jalpy uzyndyǵy 11,5 shaqyrym. 9 shaqyrymdyq negizgi týnnel men oǵan parallel evakýatsııalyq týnnel qurylysy aıaqtalǵan, elektromehanıkalyq júıeler ornatylyp jatyr.
Joba Grýzııanyń Soltústik-Ońtústik kólik dáliziniń bóligi bolyp tabylatyn Jınvalı-Larsı jolynda júzege asyrylyp otyr. Jańa 23 shaqyrymdyq jol jyl boıy kólik qozǵalysyn qamtamasyz etýge jáne ýchaske boıyndaǵy qaýipsizdikti jaqsartýǵa arnalǵan. Qazirgi ýaqytta klımattyq jaǵdaıyna baılanysty bul aımaqtaǵy joldar jylyna orta eseppen 100 kún boıy paıdalanylmaı keledi.
Joba aıaqtalǵannan keıin Kveshetı men Kobı arasyndaǵy 1 saǵattyq jol 15 mınýtqa deıin qysqarady. Grýzııa bıligi sonymen qatar jol qozǵalysy qaýipsizdigin jaqsartýǵa jáne Soltústik-Ońtústik dáliziniń tranzıttik áleýetin arttyrýǵa kúsh salmaq.
Jobanyń jalpy quny shamamen 1,24 mıllıard ları (219,9 mıllıard teńge). Ony Azııa damý banki men Eýropalyq qaıta qurý jáne damý bankiniń qatysýymen Grýzııanyń memlekettik bıýdjeti qarjylandyryp otyr. Grýzııa bıligi jobany 2028 jyldyń sońyna deıin aıaqtamaq.
Ótken aıda Grýzııada eń bıik záýlim ǵımarattyń jobasy tanystyrylǵan bolatyn.
