Grýzııada poıyz keshikken jaǵdaıda jolaýshylarǵa ótemaqy tólenetin boldy
ASTANA. KAZINFORM - Grýzııa Ekonomıka mınıstrligi temirjol jolaýshylarynyń quqyqtaryn qorǵaýǵa qatysty jańa erejelerdi bekitti. Qujat poıyz keshikken jaǵdaıda ótemaqy tóleýdi jáne reıs toqtatylǵan, baǵyt ózgergen nemese júkke qatysty másele týyndaǵan kezde jolaýshylarǵa qosymsha kepildikter berýdi kózdeıdi, dep habarlaıdy Kazinform agenttiginiń menshikti tilshisi Grýzııanyń Zańnama habarshysyna silteme jasap.
Bekitilgen erejege sáıkes, poıyz temirjol kompanııasynyń kinásinen keshikse jáne jolaýshyǵa bılet quny qaıtarylmasa, oǵan ótemaqy tólenedi.
Poıyz 60-119 mınýtqa keshikken jaǵdaıda jolaýshy bılet qunynyń keminde 25 paıyzy kóleminde ótemaqy alady.
Keshigý 120 mınýttan assa, ótemaqy mólsheri bılet qunynyń keminde 50 paıyzyn quraıdy.
Eger sapar barysynda poıyzdyń mejeli stantsııaǵa bir saǵattan astam keshigetini belgili bolsa, jolaýshy birneshe nusqanyń birin tańdaı alady.
Ol bılet qunyn tolyq qaıtarýdy talap etýge, saparyn jalǵastyrýǵa nemese baǵytyn ózgertýge quqyly.
Jańa erejeler poıyz reısi toqtatylǵan, marshrýt ózgergen, sondaı-aq júk joǵalǵan nemese búlingen jaǵdaıda jolaýshylardyń quqyqtaryn qorǵaý tártibin de belgileıdi.
Qujatta jolaýshylardy aqparattandyrýǵa jáne múmkindigi shekteýli adamdar úshin temirjol qyzmetteriniń qoljetimdiligin qamtamasyz etýge qoıylatyn talaptar da qarastyrylǵan.
Jańa talaptardyń saqtalýyn Grýzııanyń Temirjol kóligi agenttigi baqylaıdy.
Jolaýshy «Grýzııa temirjoly» kompanııasynyń shaǵym boıynsha qabyldaǵan sheshimimen kelispegen jaǵdaıda nemese belgilengen merzimde jaýap almasa, agenttikke júgine alady.
Agenttik tekserý júrgizýge jáne anyqtalǵan zań buzýshylyqtardy joıý jóninde mindetti nusqama berýge quqyly.
Sondaı-aq vedomstvo zańnamada kózdelgen ákimshilik jaýapkershilik sharalaryn qoldana alady.
Buǵan deıin Grýzııa temirjoldardy jańǵyrtýǵa 370 mln dollardan astam ınvestıtsııa salatyny habarlanǵan bolatyn.
Osyǵan deıin Grýzııa turǵyndary shetelge jıi shyǵyp, shyǵynyn edáýir arttyrǵany týraly jazdyq.
