Grýzııada polıtsııa parlament ǵımaratynyń mańynda narazylyq bildirýshilerdi taratyp jatyr

ASTANA. KAZINFORM –  Arnaıy kúshter Grýzııa parlamenti ǵımaratynyń mańynda narazylyq bildirýshilerdi taratyp jatyr. Qaýipsizdik kúshteri kózden jas aǵyzatyn gaz qoldandy, al sherýshiler barrıkadalar turǵyzdy, dep habarlaıdy DW aqparat agenttigi.

Grýzııada eldiń eýroıntegratsııa kýrsyna oralýyn talap etken jappaı narazylyq sherýleri altynshy kún qatarynan jalǵasyp jatyr.

Seısenbi kúni keshke arnaıy jasaq parlament ǵımaraty mańyndaǵy narazylyq bildirýshilerdi tarata bastady. Daýys zoraıtqyshtardan taraýǵa, kúsh qurylymdarynyń jumysyna kedergi jasamaýǵa shaqyrýlar estiledi.

Polıtsııa kózden jas aǵyzatyn gaz qoldanyp, demonstranttardy ustaýda, al narazylyq bildirýshiler barrıkadalar turǵyzyp, ot jaqty. Keıbir narazylyq bildirýshiler pırotehnıkalyq zattardy paıdalanyp jatyr.

Osy arada Grýzııanyń ІІM málimdeýinshe, keıbir sherýshilerdiń áreketi «jınalystar men sherýler týraly zańda belgilengen shekten asyp ketti». Іshki ister mınıstriniń orynbasary Aleksandr Darahvelıdzeniń aıtýynsha, sherýlerde «zańsyz áreketter jasaǵan birneshe agressıvti top anyqtaldy».

- Joǵaryda atalǵan zorlyq-zombylyq pen agressıvti áreketter ІІM-niń 143 qyzmetkeri túrli aýyr jaraqat aldy, - dedi Darahvelıdze.

Onyń aıtýynsha, bes adam qamaýǵa alynǵan. Alty kún boıy narazylyq sherýlerinde 293 demonstrant ákimshilik qamaýǵa alyndy.

Óz kezeginde grýzın quqyq qorǵaýshylary qaýipsizdik kúshteriniń tutqyndarǵa jasaǵan aıaýsyz áreketi týraly habarlaıdy.

Osyǵan deıin Grýzııadaǵy sherýler kezinde 100-den asa adam qamaýǵa alynyp, 10 polıtseı jaraqat alǵany týraly jazdyq. 

Tbılısıdegi sherýdiń úshinshi kúninde 44 adam jaraqat aldy.