Grýzııada mıtıng uıymdastyrǵandarǵa bılikti qulatýǵa áreket jasady degen aıyp taǵyldy

ASTANA.KAZINFORM - Grýzııanyń bas prokýratýrasy Tbılısıde 4 qazanda ótken sherý uıymdastyrýshylarynyń beseýine úkimetti qulatýǵa shaqyrdy jáne konstıtýtsııalyq qurylysty kúshpen ózgertýge áreket jasady degen aıyp taqty.

- Grýzııa Bas prokýratýrasy Paata Býrchýladze, Mýrtaz Zodelava, Iraklı Nadıradze, Paata Mandjgaladze jáne Lasha Berıdzege toptyq zorlyq-zombylyqty uıymdastyrdy jáne oǵan jetekshilik etti, strategııalyq jáne arnaıy nysandy basyp alýǵa árekettendi, konstıtýtsııalyq qurylysty kúshpen ózgertti jáne memlekettik bılikti joıýǵa shaqyrdy degen aıyp taqty.

Bas prokýratýranyń málimetinshe, aıyptalýshylar toǵyz jylǵa bas bostandyǵynan aıyrylýy múmkin.

Esterińizge sala keteıik, Tbılısıde 4 qazanda mýnıtsıpalıtet saılaýy kúni «beıbit tóńkeris» týraly málimdelgen narazylyq aktsııasy ótti. Uıymdastyrý komıteti Grýzııanyń qazirgi úkimetin zańsyz dep tanyp, «bılikti beıbit jolmen berýdi» talap etti. Saıası keńes uıymdastyrýshylarynyń shaqyrýy boıynsha keıbir demonstranttar negizgi narazylyq alańynan shamamen bir shaqyrym jerde ornalasqan prezıdent rezıdentsııasyna basyp kirýge árekettendi.

Arnaıy jasaq sherýshilerdi kózden jas aǵyzatyn gaz ben sý atqyshtaryn qoldanyp, keri yǵystyrdy. Jaqyn mańdaǵy kóshelerde demonstranttar bar men meıramhana jabdyqtaryn paıdalanyp, barrıkadalar turǵyzdy. Sol jerden polıtsııaǵa otshashýlar men tastar laqtyryldy.

Keıin Tbılısıdegi narazylyq bildirýshiler prezıdent saraıyna irgeles aýmaqty tastap ketti.

Premer-mınıstr Iraklıı Kobahıdze tártipsizdikti memlekettik tóńkeris áreketi dep atady.

Grýzııa Ortalyq saılaý komıssııasynyń málimetinshe, «Grýzın armany» partııasy barlyq mýnıtsıpalıtette ótken saılaýda 81 paıyzdan astam daýys jınap, jeńiske jetti. Alaıda saılaýǵa qatysýshylar sany óte tómen boldy.

Saılaý EQYU-nyń halyqaralyq baqylaýshylarynsyz ótti.