Grýzııada maska taǵý erejesin buzǵandarǵa aıyppul salynady
TBILISI. NOVOSTI-GRÝZIıA – QazAqparat – Grýzııada maska taǵý erejesin buzǵandarǵa aıyppul salynady. Grýzııa parlamentine Qylmystyq kodeks jáne Ákimshilik quqyq buzýshylyqtar týraly kodekske tıisti túzetýler engizý usynylǵan, dep habarlaıdy QazAqparat «Novostı-Grýzııa» saıtyna silteme jasap.
Túzetýlerge sáıkes, jabyq qoǵamdyq orynda maska taǵý erejesin buzǵan jeke tulǵaǵa 50 ları (shamamen 17 dollar) kóleminde aıyppul salynady. Osy arada, óziniń ıeligindegi nemese jalǵa alyp otyrǵan jabyq qoǵamdyq orynda adamdardyń maskasyz júrýine jol bergen zańdy tulǵaǵa 500 ları (shamamen 170 dollar) kóleminde aıyppul salynady.
Zań jobasyna sáıkes, qoǵamdyq kólikpen, sonymen birge metroda kele jatyp, maska taqpaǵan jolaýshylarǵa 50 ları kóleminde aıyppul salynady. Maska taqpaǵan qoǵamdyq kólik júrgizýshisi de 50 ları tóleýi tıis bolady.
Taksıge keletin bolsaq (M1 sanaty), bul jaǵdaıda jolaýshylar da betperde kııýi tıis. Eger jolaýshy maska taqpasa, ózine de, taksı júrgizýshisine de 50 ları tóleýge týra keledi. Sondaı-aq, eger avtomobıl ishinde júrgizýshimen qosa jol júrip kele jatqandar sany tórt adamnan asatyn bolsa, barlyǵy 50 larıden tóleıdi.
Ózgerister oqshaýlaý jáne karantın erejelerin buzǵandarǵa da qatysty bolady: bul jaǵdaıda jeke tulǵaǵa 2 myń ları (shamamen 690 dollar), al zańdy tulǵa – 10 myń ları (shamamen 3,4 myń dollar) kóleminde aıyppul tóleıdi.
