Grýzııada qutqarýshylar tikushaǵy apatqa ushyrady: Elde qaraly kún jarııalandy

TBILISI. QazAqparat –Grýzııada qutqarýshylar brıgadasy mingen tikushaq apatqa ushyrap, 8 adam qaza boldy, dep habarlaıdy QazAqparat «Grýzııa jańalyqtary» agenttigine silteme jasap.

29 shilde kúni Gýdaýrı taýlaryna qulaǵan paraplanerısterdi qutqarý operatsııasy kezinde Grýzııa Іshki ister mınıstrliginiń shekara polıtsııasyna tıesili MI-8 tikushaǵy apatqa ushyrap, jaryldy.

Tikushaq kúnniń ekinshi jartysynda Tbılısıden Gýdaýrıge ushyp shyqqan. Maqsaty Densaýlyq saqtaý mınıstrliginiń shuǵyl kómek ortalyǵynyń dárigerlerin jáne Іshki ister mınıstrliginiń tótenshe jaǵdaılar basqarmasynyń qutqarýshylaryn oqıǵa ornyna jetkizý bolǵan.

Manevr kezinde tikushaqtyń artqy bóligi taýǵa tıip ketken. Bul artqy propellerdiń buzylýyna alyp kelgen. Budan ári ushqysh basqarýǵa ıe bola almaı, tikushaq qulaı bastaǵan. Taýǵa kezekti ret soǵylǵan transport jarylyp, qaldyǵy jarǵa qulady.

Oqıǵa saldarynan 8 adam qaza boldy: ekıpaj komandıri, 3 ushqysh, 2 dáriger jáne 2 qutqarýshy.

Grýzııada búgin aza tutý kúni jarııalandy.

Foto: newsgeorgia.ge