Grýzııada kóne arameı tilinde sóıleıtin aýyl bar bolyp shyqty
ASTANA. QazAqparat - Grýzıııa astanasy Tbılısı mańyndaǵy Kanda aýylynyń turǵyndary aýyzeki tilde arameı tilinde sóılesetini anyqtaldy. Endi jergilikti dinı qyzmetkerler tildi saqtap qalýǵa áreket jasap jatyr. Ony «Kvırıs Palıtra» basylymynyń jýrnalısteri anyqtady, dep jazdy «Rosbalt».
Jalpy, búgingi tańda álemde 4 mıllıon assırııalyq ómir súredi eken (olardyń 70 myńy TMD-da), alaıda olardyń barlyǵy arameı tilin bilmeıdi.
«Búginde álemde 7000-ǵa jýyq til bar, olardyń 50-den 90 paıyzǵa deıini aldaǵy júzjyldyqta joıylyp ketýi múmkin. Kóne arameı tili kıeli jer tarıhymen tyǵyz baılanysty. Ol - erekshe til, onyń joıylmaǵany durys», - dedi Kembrıdj ýnıversıtetiniń professory Djefrı Han.
Grýzııadaǵy Kanda qystaǵynda eki myńǵa jýyq halyq bar, solardyń kóbi osy tilde sóılesedi. Jalpy, Grýzııada 4 myńdaı assırııalyq turady.
Kanda aýylynda arameı tilin jergilikti shirkeý qoldap otyr. Dinı qyzmetker Serafım ákeı Grýzııanyń Aǵartý mınıstrine jergilikti mekteptiń bastaýysh synyptaryna arameı tilin oqytý úshin ruqsat surap otyr. «Eń bastysy bul tildi úıretetin oqytýshylar bar. Bizge oqytýǵa ruqsat berse boldy. Aýyl arameı tilinde sóılegenmen, bul tilde oqyp, jaza alatyndar neken-saıaq. Isa Paıǵambar tili umytylmaýy tıis!», - deıdi din qyzmetshisi.
