Grýzııada qoǵamdyq tamaqtaný oryndarynda plastık bótelkelerge tyıym salynady
ASTANA. KAZINFORM – Grýzııada 1 shildeden bastap qoǵamdyq tamaqtaný oryndarynda sýsyndardy plastık bótelkelermen usynýǵa tyıym salynady, dep habarlaıdy eldiń Birinshi qoǵamdyq arnasy.
Úkimet qaýlysyna sáıkes, jańa talap meıramhanalar, kafeler jáne basqa da qoǵamdyq tamaqtaný oryndaryna qatysty bolady.
Aıta keteıik, 2026 jylǵy 1 sáýirden bastap elde birqatar birrettik plastık ónimderin satýǵa tyıym kúshine engen. Atap aıtqanda, plastık shanyshqylar, pyshaqtar, qasyqtar, taıaqshalar, tárelkeler, tútiksheler, aralastyrǵyshtar, sondaı-aq taǵamǵa arnalǵan konteınerler, qaqpaqtar men polıstıroldan jasalǵan staqandar satylmaıdy.
Buǵan deıin, 2026 jylǵy 1 qańtardan bastap atalǵan ónimderdi ımporttaý men óndirýge de shekteý engizilgen.
Sondaı-aq 1 shildeden bastap qoǵamdyq tamaqtaný oryndarynda birrettik plastık konteınerler men staqandardy qoldanýǵa da tyıym salynady.
Al 2031 jylǵy 1 aqpannan bastap (eksportty qospaǵanda) plastık bótelkelerdegi sýsyndardy óndirýge, ımporttaýǵa jáne satýǵa tolyq tyıym engiziledi. Bul shekteý kólemi 3 lıtrden asatyn aýyz sýǵa jáne 20 lıtrden joǵary ydystardaǵy basqa sýsyndarǵa qoldanylmaıdy.
Bul sharalar plastık tutynýdy azaıtýǵa jáne ekologııalyq júktemeni tómendetýge baǵyttalǵan.
