Grýzııada Qazaqstannyń jańa Qurmetti konsýldyǵy ashyldy
ASTANA. KAZINFORM — Ýrekı, Bahmaro jáne Shekvetılı sııaqty teńiz jáne taý kýrorttarymen tanymal Gýrııa aımaǵynda Qazaqstannyń Qurmetti konsýldyǵynyń saltanatty ashylý rásimi ótti. Bul týraly QR SІM málim etti.
Іs-sharaǵa Grýzııa Syrtqy ister mınıstriniń orynbasary Aleksandr Hvtısıashvılı, Ozýrgetı qalasynyń meri Avtandıl Talakvadze, Parlament jáne sakrebýlo (jergilikti ózin-ózi basqarý) depýtattary, sondaı-aq qoǵamdyq-saıası jáne isker toptardyń ókilderi qatysty.
Qurmetti konsýl bolyp Gýrııa aımaǵynyń týmasy, belgili grýzın kásipkeri, «Aǵaıyndy Askanelı» atymen tanymal sharap kompanııasynyń teń ıesi Gocha Chhaıdze taǵaıyndaldy.
Saltanatty rásimdi ashqan Qazaqstannyń Grýzııadaǵy Elshisi Málik Myrzalın Grýzııanyń erekshe ekonomıkalyq, mádenı jáne týrıstik aımaqtarynyń birinde bizdiń eldiń Qurmetti konsýldyǵynyń ashylýy eki memlekettiń qarym-qatynastarynyń joǵary deńgeıiniń jáne olardy nyǵaıtý baǵytynyń saqtalýynyń kezekti dáleli ekenin atap ótti.
— Óz kezeginde Grýzııa Syrtqy ister mınıstriniń orynbasary Qazaqstan tarapyna kezekti Qurmetti konsýldyqty ashý týraly sheshimi úshin alǵysyn bildirdi. Qazaqstan Grýzııanyń mańyzdy seriktesi jáne resmı Tbılısı Astanamen ekijaqty jáne kópjaqty formatta yntymaqtastyqty jandandyrýǵa múddeli ekenin málimdedi, — delingen habarlamada.
Ozýrgetı qalasynyń meri bul mekeme eki respýblıkanyń óńirleri men qalalary arasyndaǵy ekonomıkalyq yntymaqtastyqty keńeıtýge, ınvestıtsııalardyń ósýine, týrızmdi damytýǵa jáne ǵylymı-mádenı almasýǵa yqpal etetinine senim bildirdi.
Qurmetti konsýl G. Chhaıdze óz sózinde eki memlekettiń oǵan kórsetken senimi úshin alǵysyn bildirip, Qazaqstan-Grýzııa qatynastaryn nyǵaıtýǵa bar kúshin salatynyna sendirdi. Onyń josparynda jańa jobalardy iske asyrý, bıznes-delegatsııalar men mádenıet qaıratkerlerimen almasý, sondaı-aq baýyrlastyq baılanystar men óńiraralyq yntymaqtastyq ornatý bar ekenin atap ótti.