Grýzııada qazaqstandyq kompanııa «Jyldyń eń belsendi ınvestory» marapatyna ıe boldy
ASTANA. KAZINFORM – Grýzııa naryǵynda jumys isteıtin bıznes kóshbasshylaryna arnalǵan XXIII marapattaý rásimi ótti. Quzyretti qazylar alqasynyń sheshimi boıynsha «Batýmı teńiz porty» JShS «Investıtsııalyq tartymdylyq, joǵary qaýipsizdik deńgeıi, dınamıkalyq ósý jáne damý» nomınatsııasynda jeńimpaz atandy, sondaı-aq sarapshylar men bıznesmenderdiń daýys berý qorytyndysy boıynsha «Grýzııanyń eń iri salyq tóleýshisi» nomınatsııasynda kóshbasshy dep tanyldy.
«Georgian Times» medıaholdınginiń bıznes-syılyǵy 1995 jyly qurylǵan. Ol jyl saıyn Grýzııada jumys oryndaryn, valıýta resýrstaryn jáne eldiń eksporttyq áleýetin júzege asyryp jatqan úzdik kompanııalarǵa tabystalady.
Qazylar alqasynyń músheleri Batýmı portynyń basshylyǵy onyń damýyna, negizgi nysandardy jańartýǵa, sapa men qaýipsizdikti basqarýdyń zamanaýı standarttaryn engizýge úlken kóńil bóletinin atap ótti. Joǵary kásibı komanda, damyǵan ınfraqurylym, qolaıly ornalasý jáne ámbebaptyq portty paıdalanýshylarǵa keń aýqymdy sapaly qyzmetterdi ońtaıly jaǵdaılarda usynýǵa múmkindik beredi dep kórsetildi.
Porttyń bas dırektory Ulan Tleýǵalıǵa marapatty tabystaý barysynda Grýzııa Parlamenti tóraǵasynyń birinshi orynbasary Gııa Volskıı Batýmı teńiz porty Eýropa-Kavkaz-Azııa kólik dáliziniń mańyzdy býyny ekenin atap ótti. «Júk aınalymynyń serpindi ósýi porttyń sarqylmas óndiristik múmkindikterin jáne maqsatty, belsendi jumysyn kórsetedi. Port jańa deńgeıge shyǵyp, damýyn jalǵastyrýda, óıtkeni onyń odan da jaqsy nátıjelerge qol jetkizýge áleýeti bar», – dedi depýtat.
«Jobanyń maqsaty – ulttyq bıznestiń eń tabysty salalaryn anyqtaý, bıznes, bılik jáne qoǵam arasyndaǵy dıalogty qoldaý. Bizdiń marapattarymyz el ekonomıkasynyń 90 paıyzyn quraıtyn kúshti kompanııalardy aıqyndaıdy», – dep atap ótti «Georgian Times» medıaholdınginiń negizin qalaýshy jáne prezıdenti, bıznes syılyqtyń negizin qalaýshy Malhaz Gýlashvılı.
Aıta keteıik, qazaqstandyq memlekettik kompanııa «QazTransOıl» AQ 2017 jylǵy 22 tamyzdan bastap «Batýmı munaı termınaly» JShQ-nyń Grýzııadaǵy óndiristik aktıvterdi tikeleı ıelený jáne basqarý júzege asyrylatyn 100% qatysý úlesine ıe. «Batýmı munaı termınaly» JShQ «Batýmı teńiz porty» JShQ-nyń 100% úlesin basqarýǵa aıryqsha quqyqqa ıe.
