Grýzııada qazaq ulttyq taǵamdaryn usynatyn meıramhana ashyldy
Grýzııada turatyn Qazaqstan azamattary bul jańalyqty qýana qabyldap, áleýmettik jelilerde bólisip jatyr. Olar bul meken jyraqta júrgen jerlester bas qosatyn orynǵa aınaldy dep jazýda.
Tbılısıde kóptegen ult pen din ókilderi turady. Otanynan alysta bolǵandyqtan, ulttyq taǵamdarynyń dámin saǵynatyny túsinikti.
Qalada ıtalııalyq, ýkraınalyq jáne ózbek dámhanalary bar. Al jaqynda qazaq meıramhanasy da ashyldy. Aıta keter bir jaıt, onda aspazshy bolyp grýzın áıeli jumysy isteıdi.
«Túrli dámhanalarda istedim, lıvandyq, ýkraınalyq, grýzııalyq. Qazaq meıramhanasy ashylatynyn estip, osynda jumysqa ornalasýǵa keldim. Jańa taǵamdardy tanyp bilýdi unatamyn. Osynda meni qazaq aspazshy úıretti. Bul Grýzııa taǵamdarynan erekshe: qoı men jylqy eti, jalpy kóp mólsherde et pen pııaz salady. Maǵan unaıdy»,- deıdi aspazshy Nıno Kýrkýnýlı.
Meıramhanany Qazaqstannan kelgen úsh jas adam ashty. Ulttyq taǵamdarynyń dámin saǵynǵandyqtan, osyndaı qadamǵa barǵanyn aıtady. Grýzııada kezdespeıtin ónimdi, mysaly jylqy eti Qazaqstannan ákelinedi.
«Bul dámhanany eń aldymen Grýzııada turatyn qazaqtar úshin ashtyq. Olardan basqa jańa taǵamdarǵa qyzyqqan jergilikti turǵyndar kóptep keledi. Olarǵa qazaqsha et pen baýyrsaqtar óte unaıdy. Mantyny ózderiniń ulttyq taǵamy - hınkalımen salystyrady. Ashylǵanyna eki-aq aı ótse de, meıramhana tabysty jumys istep keledi», - deıdi qazaq meıramhanasynyń ıesi Erkesh Baımuhambet.
